«Кило шылым мош ужаледа?»

Эртыше каныш кечын, 25 январьыште, Нефтекамск олаште тенийлан икымше телымсе ял озанлык ярмиҥга эртыш. Уремыште йӱштӧ мардеж витара ыле гынат, шке озанлыкыште, сад-пакчаште ончен куштымо сатум налаш оласе калык шагал огыл чумырген ыле.

Кочкыш-йӱышым ужалыме ярмиҥгаште еҥ-влак телым утларакшым мом налыт? Конешне, вольык да кайыквусо шылым. Пазарыште ушкал да сӧсна, комбо, чыве шылым ужалыше-влак кажне ошкыл еда гаяк вашлиялтыч. Кролик шылымат ужалышт. «Кушеч улыда?» манын йодмылан шукыжо Краснокам, Янаул, Илиш, Бурай, Балтач районла гыч улмыштым палдарышт. Торгайыше-влак ушкал шылым килограммжым кокла шотышто 300 теҥгелан, сӧсна шылым эн шулдыжо 220, эн шергеже 280 теҥгелан ужалышт. Верын-верын кайыквусо шылымат наледышт. Чыве шылым озавате-влак ик киложым 250-280 дене ужалыме гыч койыч. Тичмаш чыве шылын акше 350-360, кугуракшын 400-500 теҥгеш шуын, пӱтыркасе кугу бройлер чывым 700 теҥгелан налаш лийын. Ӱстеллаште ужалышаш шолдыра кӱрка, комбо шыл гын поснак чеслын койыч. Нуным Татарстан республикысе Актаныш район гыч толшо сатучо-влак налаш темлышт. Ик комбылан 1500, ик кӱркалан 3000 теҥгем йодыч.

Пазарыште вучымо, кӱлешан да тутло сату - мӱй. Ярмиҥгаште саска, писте, шемшыдаҥ мӱйым ужалыше-влак радамыште шкенан кундемысе районла гыч мӱкшызӧ-влак ты гана шуэнрак вашлиялтыч. Тыгодымак пошкудо Удмуртий республикысе Сарапул район гыч толшо ужалыше-влак мӱйым, пыльцам, пергам, шыште гыч ыштыме сортам да моло сатуштым лыҥак темлышт. Кум литран банкысе мӱйым пазарыште, 1500 теҥге гыч тӱҥалын, 2300 теҥге марте налаш лийын.

Ола воктенсе яллаште илыше-влак тӱрлӧ эмшудым, облепихым, кылмыктыме емыжым, свежа шӧр-торыкым, чыве муным (Лу пырчыжым 70 теҥге дене темлат ыле.) яшлыклаш темкален ужалаш конденыт. Нунымат оласе калык наледыш.

Моло ял озанлык ярмиҥга-влакым тений, Нефтекамск ола администрацийын увертарымыж почеш, 15 февральыште, 22 августышто, 19 сентябрьыште, 10 да 24 октябрьыште, 7 да 21 ноябрьыште, 5, 19, 26 декабрьыште эртараш палемдыме.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».