Эртышым иктешлыме, ончыкылыкым рашемдыме

10 декабрьыште Башкортостан Вуйлык Радий Хабиров БР Кугыжаныш Собранийлан - Курултайлан черетан Посланийжым йоҥгалтарен. Тушто тудо эн ондак калыкыште икоян улмо шӱлышым, шке да республикын вийжылан ӱшаныме кумылым вияҥдаш ӱжын.

Бюджетникын пашадарже. Посланийыште ончыкылык ыштышаш сомыл семын тудо бюджетник-влаклан пашадарым кугемдыме нерген увертарен. Тидлан шушаш идалыкыште оксам тенийсе деч 1,6 миллиард теҥгелан шукырак ойырена манын палемден.

Инвестиций, паша вер. Республика Вуйлык паша верым ыштыме йодышым ончыл верыш шынден. У паша верым пуышо, у производствым почшо-влаклан полышым пуаш сӧрен. Калыклан сайын илаш виян экономика кӱлеш.

Кадр вашталтыш. Райадминистраций вуйлатыше-влакым вашталтыме йодышымат тӱҥлан шотлен. Республикын коло районыштыжо да вич олаштыже лийше вашталтыш нерген ойлен. Вуйлатыше-влак постыштышт кок срок деч шукырак лийшаш огытыл, у тукым вуйлатыше-влак толыт манын каласен.

Коррупцийым чактараш. «Кугыжаныш кӱсеныш кидым шуйышо-влакын лӱмыштым йӱкын ойлаш тӱҥалына, молан манаш гын корным чоҥымо, подъездым, кудывече-влакым ачалымаште веле огыл, эсогыл школлаште кочмыверыште йоча-влакын кочкышыштым шолыштыт», - каласен Радий Хабиров. Мутшо почеш, коррупций шотышто ий тӱҥалтыш годсек 37 титаклыме приговорым лукмо, 42 уголовный пашам тарватыме.

«Инцидент» система мом вашталтен? БР Вуйлык калыкым тургыжландарыше йодышым рашемдымаште, проблемым кораҥдымаште «Инцидент менеджмент» системын кугу верым айлымыжым палемден, тудлан кӧра кугыжаныш кучем калык деке шинчаваш савырнен манын ойлен.

Вер-шӧрым тӱшкан тӱзаташ. Радий Хабиров илыме вер-шӧрым тӱшкан тӱзаташ, яллаште, олалаште субботникыш пырля чумырген лекташ ӱжын. Ончыкыжым подъездым, кудывечым эше шукырак ачалена, уремлам волгалтараш тӱҥалына манын ӱшандарен.

Транспорт шотышто. «Мый «Башавтотранслан» республикысе чыла район гыч Уфашке общественный транспортым колташ шӱденам, райрӱдылам чыла ял дене общественный транспорт дене «ушаш» задачым шынденам. Мемнан транспорт элыште ик эн сай лийшаш», - каласен республика Вуйлык. Тыгак корным саемдыме сомылым умбакыже шуйымо, 2024 ий марте кундемысе чыла кӱварым шотыш кондаш шийвундым ойырымо нерген ойлен.

Медициным вияҥдаш. Радий Хабиров больницылашке 660 у медицина пашаеҥ толмым, первичный медицина полышым шотыш кондымым, приемыш коштмо йодышым куштылемдымым, больницылаште черет шагалеммым, районлаште поликлиника-влакым почмым, капитально ачалымашым, тыгак республикысе онкодиспансерым, хосписым, шӱм да вӱргорно чер деч колымашым шагалемдашлан кардиорӱдерым чоҥымым, санавиацийым пашаш колтымым сайлан шотлен.

Школлаште пукшымо нерген. Школлаште йоча-влакым пукшымо системым тӧрлаш - ик эн пӱсӧ йодыш. Радий Хабиров школ столовыйышто кочшо йоча шукеммым, кочкышым саемдымым палемден, лишыл жапыште чыла тунемше шокшо кечывалкочкышым школышто ышташ тӱҥалеш манын ӱшандарен.

Самырык кадрым аклаш. Республика вуйлык Радий Хабиров кундемысе вуз-влаклан ӧрдыж верла гыч огыл, а шкенан республика абитуриент-влакым чолганрак шке деке лишемдаш йодын. «Башкортостанлан таче самырык, талантан профессионал-влак кӱлыт. Республика деч ӧрдыжтӧ тунемше студентна-влакланат ме паша вер дене эре полшаш ямде улына, вучена», - каласен тудо.

Ава-ача улмаш - пиал. Тыгодымак Радий Хабиров курымла дене вияҥше еш илыш-йӱла начареммым палемден: «Ме кызыт материальный поянлыкым, карьерым утыждене ончыл верыш луктынна, ава-ача пиал нерген монденна. Тӱҥжӧ - тиде пеҥгыде, шуко икшыван еш, поро, чын, ӱшанле икшывым ончен куштымаш. Республикына кажне шочшо икшывылан куана. Тидым самырык мужыр-влак эре шарнышаш улыт».

БР Вуйлыкын официальный сайтше гыч налме фото.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».