Эн мотор селам ойыреныт

«Башкортостан Республикын муниципальный образованийже-влакын Советышт» ассоциацийын да «Башкортостан» ТРК ГУП-ын эртарыме конкурсыш 48 йодмашым колтеныт. Тушеч лу ял ден селаже финалыш лектыныт. Нунын коклаш Мишкан район Пӱнчер марий ялат логалын ыле.

БСТ телеканалын сайтыштыже йӱклымашым увертарымек, финалист-влак коклаште пеш тале «кучедалмаш» ылыже. Кажныжын шукырак йӱкым погымыжо шуын. Пӱнчер-влакат пеш кугу пашам тарватеныт: Интернетыште марий-влакым ушышо могай гына тӱшкам верештыныт, чылаж денат кылым ыштеныт, йӱклымаш кайыме нерген увертараш йодыныт. Тыршымыштын лектышыжымат эскераш лийын - тӱҥалтыштак шукырак йӱкым поген, лу кече коклаште ты чотым арален коден кертыч. Йӱклымаште кокымшо верыш лектыч (Марий-влак да, векат, моло калык гыч улшо палымыштат, рӱж тарванен, нунылан 48 тӱжем наре йӱкым пуэныт).

Арамлан огыл Пӱнчерым «Зритель-влак симпатий приз» дене палемденыт. Тыге чылаже 12 селам тӱрлӧ номинацийыште кумылаҥденыт да кажныжлан 20 тӱжем теҥге дене, 33-шылан дипломым кучыктеныт. Сеҥыше-влаклан илыме верыштышт эше иктаж поро пашам ворандарен колташ ситышашлык оксам - икымше верлан 500 тӱжем, кокымшылан 300 тӱжем, кумшо верлан 200 тӱжем теҥгем - ойыреныт.

Сеҥышым ойырен налаш пеш кугу пашам шуктымо шижалтын. БСТ-н эрденысе «Салям» передачыштыже «Башкортостан Республикын эн мотор селаже - 2019» конкурсым иктешлыме кечын организатор-влак кажне илыме верыш шке миен коштмышт, тушто чыла шотышто илыш кузе «шолмым» эскерыме, чылажымат 18 критерий дене аклыме нерген каласкалышт. Тылеч ончыч телевиденийлан финалист-влак дене палдарыше ятыр оҥай сюжетымат ямдыленыт ыле.

Мутат уке, кажне конкурс - тиде шкешотан таҥасымаш. Тушто сеҥышат, сеҥалтшат лиеш, но тудо тыглай гына огеш эрте, могай-гынат поро кышам кода. Пӱнчер-влак «Вконтакте» соцлаштыкыште вӱдымӧ тӱшкаштышт пеш чын палемденыт: «Тыгай конкурс шкенам ӧрдыж гыч ончалаш, сай велым да ситыдымашым ужаш йӧным пуа. Мемнан нерген шуко еҥ пален налме поснак куандара. Шоҥешталтше пуранам да тутло меланам тамлен ончаш, куштымаш пайремышкына толын каяш шонышо-влакат лектыныт дыр. А унам вашлияш сайын ямдылалтман. Шкенан ялнам моторракым да сайракым ышташ икоян команда кӱлеш. Ончыко, Пӱнчер! У кӱкшыт-влакым сеҥаш!».