Башкир журналистика курымла кокласе лончышто

Тудо Башкортостан Республикылан 100 ий да журналист-влаклан Ш. Худайбердин лӱмеш премийым пуаш тӱҥалмылан 30 ий темме дене кылдалтын. Конференцийыш шанчыеҥ, мер, музей пашаеҥ, журналист, писатель, тыгак БГУ-н журналист факультетыштыже тунемше студент-влак чумыргеныт ыле.

Ш. Худайбердин лӱмеш музей-пӧрт ойлышо-влакын шымлыме пашаштым, статьяштым конференций деч ончычак чумыр сборник семын савыктен луктын. Сборникым да конференцийым ямдылыме паша радам нерген музей-пӧртым вуйлатыше Юнир Минишев каласкалыш.

Башкортостан Республикысе национальный музейын генеральный директоржо М. Зулькарнаевын, «Республика Башкортостан» Издательский пӧртын генеральный директоржо В. Хакимован да моло-влакын ойлымыштышт республикысе прессын историйже да кызытсе илышыже, Башкортостаныште илыше тӱрлӧ калык-влакын йылмышт дене лекше периодический изданий-влакым, Мажит Гафурин да Шагит Худайбердинын публицистикыштым, башкир писатель ден журналист-влакын пашаштым арален кодымаште музей-влакын рольышт нерген йодыш-влакым тарватыме. Лукмо сборникыште тиде темым эше кумданрак почын пуымо, тушто республикысе национальный периодический печатьын шочмыжо, кушкын толмыжо, Ш. Худайбердинын надырже, журналистикын этнокультурный шӧрынжӧ нерген лудаш лиеш. Сборник тыгак Ш. Худайбердин лӱмеш премийым налше лауреат-влак дене палдара. «Марийская печать в Башкортостане - от истоков до современности» тема дене докладым «Чолман» газетын тӱҥ редакторжо И. Губаев ыштыш.

Конференций деч вара тушко погынышо-влак А. Матросов лӱмеш паркыште Шагит Худайбердинын шӱгар ӱмбакыже пеледышым пыштышт, Булат Юсуповын «Икымше республика» художественный фильмжым ончышт.