Cубботник пайдалын эртыш

Лу шагат эрдене «пашаче десант-влак», #СДЕЛАЕМ2019 логотипан фартукым ӱшталын, оласе паркын Кугу сценыже ончылан чумыргышт. Каныш кечын шочмо вер-шӧрым эрыкташ верысе предприятий, образований, тӱвыра да моло учреждений-влакын пашаеҥже, студент, тунемше-влак лектыныт ыле. Погынышо калыкым сцена гыч ола администраций вуйлыкын социальный йодыш шотышто алмаштышыже И.С. Ахмадишина саламлыш. Весела вӱдышӧ, куштышо йоча коллектив-влак, калыкын кумылжым сайынак нӧлталын, рӱж пашалан таратышт. Тыге кечывал марте учреждений-влакын коллективышт паша верысе территорийыштым, паркым, аллей-влакым куштыра, йогышо лышташ деч теле вашеш тыршенак эрыктышт. Южо коллектив-влак каналтыме годым шокшо чайым уремыштак подыльыч.