НЕФТЕКАМСКЫШТЕ ДА БИРСКЫШТЕ – ОЛАН КЕЧЫЖЕ

НЕФТЕКАМСКЫШТЕ Башкир эстрадын лӱмлӧ шӱдыржӧ, шуко семӱзгар дене шоктышо ZAINETDIN дене пырля зарядкыш лекташ, Башкир кугыжаныш курчак театрын «Чодыра ярмиҥга» спектакльжым, еш дене кином, Нефтекамск ола администраций вуйлатышын Кубокшылан эртарыме хоккей турнирын финалжым, выставкылам, пеледыш пайремым, КВН-ым, оласе коллектив-влакын да кастене лӱмлӧ артист-влакын концертыштым ончаш, спорт пайремыш ушнаш лиеш.

БИРСКЫШТЕ ты шуматкече «Бирск олма - 2019» фестиваль семын шарнаш кодшаш. Оласе пазарыште эр гычак олмапум, моло кушкылым, шке озанлыклаште ончен куштымо пакчасаскам ужалаш тӱҥалыт. «Берендей» дендропаркыште фиточайым, олмам тамлаш, стадионышто ола-влакын командышт коклаште футбол матчым, «Исток» трассыште мотокроссым ончаш, Октябрьский площадьыште мастар-влакын кидпашаштым аклаш да наледаш лиеш. Тений эше мӱкшызӧ-влакым «Мӱян провинций» конкурсыш ушнаш ӱжыт. А кастене «Эх, олмажат» фольклор фестивальым, олан лӱмгечыжлан концертым эртарат. Кок олаштыжат пайрем кече фейерверк дене мучашлалтеш.