Вашталтыш илышым саемдышаш

Тушко Башкортостан Республикысе Кугыжаныш Собранийын - Курултайын вуйлатышыже Константин Толкачев, Нефтекамск ола администрацийым вуйлатыше Ратмир Мавлиев, республикысе тӱрлӧ министерство да кугыжаныш комитетын еҥышт миеныт ыле. Константин Толкачевын мутшо гыч, Башкортостаныште национальный проект почеш коло вич региональный проект илышыш шыҥдаралтеш.

Нуно социально-ориентированный улмышт дене ойыртемалтыт, илышын тӱрлӧ шӧрынжым авалтат. Чыла палемдыме вашталтыш-влак Россий Президент Владимир Путинын «О национальных целях и стратегических задачах развития на период до 2024 года» указше негызеш шукталтыт. Поснак кугу тӱткыш «Оласе среда» проектыш пурышо подъездым ачалыме программылан, «Башкир кудывече-влак» проектлан, общественный вер-шӧрым тӱзатыме сомыллан ойыралтеш. Проект почеш республика мучко 400 кудывечым, 4000 подъездым, 140 наре общественный верым тӱзаташ палемдыме. «Оласе среда» проект почеш пашам шукташ Нефтекамск олалан 193,4 миллион теҥгем ойырымо. Вашталтыш-влак образований ден здравоохранений системымат авалтат: национальный проект полшымо дене 22 школым, 19 йочасадым, кок йоча поликлиникым, ФАП ден ФОК-влакым почаш палемдыме. К. Толкачев калык нине валталтыш-влак нерген палышаш веле огыл, а кажне олаште, селаште нуным илышыш шыҥдарымашке чолган ушнышаш манын палемдыш.

Погынымаште Р. Мавлиев Нефтекамск олаште национальный проект почеш могай пашам шуктымо дене палдарыш. «Демографий», «Илыме вер да оласе среда», «Изи да кокла предпринимательство» нацпроект-влакым республикыште илышыш шыҥдарыме ойыртем нерген БР образований министрын икымше алмаштышыже И. Мавлетбердин, БР еш, паша да калыкым социально аралыше министрын алмаштышыже Л. Каримова да молат каласкалышт.