Ратмир Мавлиев: «Сай вашталтышыш шуаш манын, кеч-могай йодышлан тӱткылыкым ойырыман»

А кузе олан илышыжым саемдымаш, могай вашталтышым пуртымаш калыкын темлымыже да лектын шогышо йодышыжо-влак дечат шога, садлан ола вуйлык тыгай вашлиймаш ден пырля каҥашымаш-влакым пайдалылан шотла. Ятыр вере тротуар уке, улшыжат тоштемын, шуко пачашан пӧртым чоҥымо годым кудывечыште автомашинам шогалтыме, йоча-влаклан модмо верым огыт ыштыл, но газоныш машинам шогалтыше-влаклан закон почеш штрафым тӱлыктат, маныт еҥ-влак. Р. Мавлиев ончыкыжо тыгай йодыш-влак шотышто чоҥымо пашам шуктышо подрядчик-влаклан пеҥгыде условийым шындаш тӱҥалына манын ӱшандарыш.

Лишыл жапыште кок у школым, йочасадым чоҥышаш проект-влакым пеҥгыдемдыме, тунемме заведенийла воктене йоча-влаклан каналташ да спорт дене заниматлаш кызытсе жаплан келшыше йӧнан площадке-влакымат ыштылаш тӱҥалнешт.

Журналист-влак промышленный предприятий-влак пелен инновационный паша проект-влакым илышыш пуртымо да тидым оласе калыкын илышыжым саемдаш, паша верым ешараш, тунемаш, канаш, спорт дене заниматлаш кучылтмо шотышто да моло нергенат ятыр йодышым пуэдышт. У микрорайонлашке корным, автобус маршрутым почмо нергенат ойым тарватышт. Р.Р. Мавлиев чылажлан радам дене вашештыш да журналист-влакын йодышышт тудын шонымашыж дене келшен толыт манын палемдыш. Ола администрацийым вуйлатыше да журналист-влак мучашлан ик ой дене тыгай вашлиймаш-влак кӱлешан улыт, ончыкыжымат нуным чӱчкыдын эртарен шогыман манын иктешлышт.