Пӱртӱслан эҥгек ынже лий манын

Лӱдыкшыдымылык шотышто икымше да кокымшо тӱшкаш пурышо химий торлан переработкым ыштыше заводым Камбарка олаште почаш шонымо ой тывел кундемысе калыкым шукертак тургыжландара. Пӱсӧ йодышым Нефтекамскыште шукерте огыл кугыжаныш кучемын еҥже, мер пашаеҥ-влак «йыргешке ӱстел» йыр лончылышт. Погынымашыште кутырен каҥашыме почеш, Камбаркысе заводышто химий шӱкшакын утилизацийжым чыла технологий йодмаш дене келшышын шукташ, лӱдыкшӧ химий торын южыш, вӱдыш логал кертме эҥгекым чыла могырымат текшыраш, тидлан чӱчкыдын тӱрлӧ шымлымашым, экспертизым эртараш палемдыме. Тиде сомылым виктарыше специалист-влак Камбаркыште почаш шонымо завод калыклан да пӱртӱслан эҥгекым кондышаш огыл манын палемдышт, тургыжландарыше ситуацийым чын умылаш да каҥашымашке ушнаш ӱжыч.