Илышыш могай вашталтышым пуртымо?

Пенсий-влак. Пенсий реформын икымше йыжыҥышкыже логалше-влак (1964 ий январьыште шочшо ӱдырамаш да 1959 ийыште шочшо пӧръеҥ-влак) ийгот шот дене тений июль тылзе гыч пенсийыш лекташ тӱҥалыт.

Пособий-влак. Инвалид икшывым ончышо да пашам ыштыдыме ава-ача, усыновитель, опекун-влаклан тылзе еда тӱлымӧ окса пособийын кугытшо икымше июль гыч 5,5 тӱжем гыч 10 тӱжем теҥгеш «кӱзен».

Сатулан маркировко. Икымше июль гыч Российыште ыштен лукмо але Российыш йот эл гыч кондымо йолчиемым маркироватлаш тӱҥалме.

Онлайн-кассе-влак. Калыклан услугым пуышо чыла организаций ден ИП, торгайыме пашаште да общепитыште ЕНВД система дене ыштыше, тыгак торгайыме автоматым кучылтшо ИП, общественный транспортышто проездной документым ужалыше перевозчик-влак онлайн-касса дене пайдаланышаш улыт.

Кредит-влак. Потребительский кредит ден займын процент ставкыштын ик кечаш кугытыштым 1,5 процент гыч 1 процент марте шагалемдыме. Вашталтышыш икымше июль деч вара ыштыме договор-влак логалыт.

Чоҥымо паша. Илыме вер шотышто проектный финансирований нерген закон вийым налын. Тудо дольщик-влакын праваштым аралаш полшышаш. Илыме верым чоҥашлан застройщик, дольщик-влакыным огыл, шкенжын але айлыме оксам кучылтшаш. Дольщик-влак оксаштым эскроу-счетыш кусарат. Застройщик нуным объектым эксплуатацийыш сдатлымеке веле налын кертеш.

Ипотека. 31 июль гыч илышыш ипотечный каникул нерген законым шыҥдарат. Тудын дене келшышын, заемщик, неле илыш ситуацийыш логалын да кредитшым тылзе еда тӱлен ок керт гын, банкым тылзе еда тӱлымӧ окса кугытым шагалемдаш але ик жап (эн шукыжо пелий) тудым тӱлаш чарналташ йодын кертеш. Тиде просрочкылан ок шотлалт да кредит историеш уда кышам ок кодо. Но тӱлымӧ процентын чумыр кугытшо ешаралтеш.

Гостиничный бизнес. Витле утла номеран гостинице-влакын «шӱдыр» категориян улмышт нерген свидетельствышт лийшаш. Тудын деч посна нунылан пашам ышташ чарыме лиеш. Свидетельство кум ий жапыште чынлан шотлалтеш. Горнолыжный трасса ден пляж-влакланат тыгай йодмашым пуртат. Гостинице шке рекламыштыже визыт деч утла «шӱдырым» ончыкта гын, тудлан административный штрафым тӱлыктен кертыт.

Транспорт. Икымше июльышто автобусым, троллейбусым, М2 ден М3 тӱшкаш пурышо, тыгак лӱдыкшӧ грузым шупшыктышо N категориян транспортым ГЛОНАСС але ГЛОНАСС/GPS спутник навигаций дене йӧнештарыме нерген йодмаш вийым налын.