Каникул ласкан эртыже манын…

Пачерыште. Йоча-влаклан шырпе, утюг да шокшо вӱд дене когарген, кӱзӧ дене пӱчкылтын, эм дене аярген кертме нерген эре ойлыман. Палыдыме еҥ-влаклан, нуно родо-шочшыда, йолташда улына манын каласат гынат, омсам почман огыл. Виш окна, балкон, лоджий эре лӱдыкшӧ улыт, почын кодыман огыл. Электроприборым, люстрым, лампычкым ночко кид дене кучыман огыл.

Пожар годым. Пӧрт гыч кайыме годым йоча-влак деч шырпым, зажигалкым, сортам, спиртым, йӱлышӧ веществам шылтен кодыман. Пожар тӱҥалын гын, сурт гыч писын куржын лектын, полышым ӱжман, пошкудо-влакым пожарный службыш йыҥгырташ йодман. 112 полыш службыш телефонышто окса да сим-карте уке годымат йыҥгырташ лиеш. А ондален йыҥгыртымылан 1500 теҥге штрафым тӱлыктат.

Уремыште. Йоча-влаклан чодыраш, кӱртньыгорныш, эҥерыш, ерыш кугыеҥ деч посна коштман огыл. Башкирийыште кеҥеж гоч ятыр еҥ, вӱдыш пурен каен, илыш дене чеверласа. Тидын годым кажныже ийын моштем манын шона.

Палыдыме еҥын мутланаш, машинаш шинчаш ӱжмыжлан икшывым «уке» манын вашешташ туныктыман. Уремыште шала коштшо пинегым, пырыс-игым ниялткалаш чарыман - нуно черле лийын кертыт.

17 ийыш шудымо икшыве-влаклан 12 шагат йӱд (телым 10 шагат кас) деч вара 6 шагат эр марте уремыште ава-ача деч посна коштман огыл. Законым пудыртымылан 3000 теҥге марте штрафым тӱлыктат.

Икшывылан смарт шагатым налын пуаш гын, тудын кушто да кӧ дене улмыжым эреак эскерен, пален шогаш йӧн уло.

Корнышто. Вуеш шудымо икшыве-влаклан шарныман: автомобиль корнылаште латныл ий марте велосипед, латкуд ий марте скутер але мопед дене кудалыштман огыл. Корным вончымо деч ончыч шолаш-пурлаш ончалме, автобусым шеҥгечше, а троллейбусым ончычшо кораҥ кайыме да корныласе моло правил нерген каласкалыман.

- Йоча-влакым шкет ида кодо, шинча ончылно кучыза!

- Шырпе дене модаш, тул-отым ылыжташ, кукшо шудым йӱлалташ чарыза!

- Икшыве-влакын койыш-шоктышыштым эскерыза. Яра жапыштым спорт кружок, секцийлаште эртараш таратыза.

- Писын ылыжше вещества-влакым шинча ончылно ида кодо!

Пожар службо - 01,

Полиций - 02,

Вашкеполыш - 03,

Аварий да экстренный службо (сото телефон гыч) - 112,

Йоча-влаклан Российысе единый ӱшан телефон - 8-800-2000-122,

Йоча-влаклан Башкортостан Республикысе ӱшан телефон - 8 (347)246-12-12, 8(347)-273-09-00,

Йочан праваже шотышто Башкортостан Республикысе уполномоченный - 8(347)-280-85-25.