Кугу Сеҥымашлан - 74 ий!

Сеҥымаш скверыште эрвелеш «Сареш вуйым пыштыше герой-влак лӱмеш» театрализованный представлений эртыш. Волгыдо пайрем дене сарын, тылын ветеранже-влакым, Шарнымаш вахтыш чумыргышо калыкым Нефтекамск ола администраций вуйлыкын пашажым шуктышо Ратмир Мавлиев саламлыш.

Элысе тыныс илыш верч сарын тулешыже вуйым пыштыше кована-кочана, кугезе кована-кочана-влакым пагален шарныме лӱмеш кажныже, вуйым савалтен, Курымашлык тул воктеке пеледышым пышташ вашкен…

Сарын ветеранже, пайремын унаже-влак ончылно торжественный марш почеш строй дене оласе тунемме заведений, предприятий, мер ушем да тӱрлӧ предприятий-влак ошкыл эртышт.

Сарыште кучедалше кова-кочан портретшым школлаште тунемше ӱдыр-рвезе, студент, ава-ача, силовой структурышто тыршыше да моло кумылан еҥ кучен ошкыльо. Тиде толкыныш 9 май кечын ола ик ешла ушныш.

Кугу Сеҥымашлан пӧлеклыме пайрем пелйӱд марте шуйныш. Шыргыжал ончышо кече калыкым Каныш да тӱвыра паркыш тыныс илышлан куанаш ӱжын. Тушто чылам «Ме - Сеҥымашын уныкаже-влак» концерт, тематика дене келшышын ямдылыме оҥай выставка, «Сеҥымашын рекордшо» спорт таҥасымаш вученыт. Пайремым муро, куштымаш дене оласе руш, татар, марий, украин тӱвыра рӱдер-влак сӧрастарышт. Пайрем «Сортам чӱктӧ» патриотизм акций да Сеҥымаш лӱмеш салют дене мучашлалте.