Тыныс лийже мландӱмбалне! Сар огеш кӱл мыланна!

Тугодсо шучко жап-влак эркын, мӱндырч солнышо йӱк семын, шижде, историеш кодыт. Тачысе кечылан Кугу Сеҥымашым лишемдыше ветеран-влакат утыр шагалемыт. Улыт гынат, эркын шоҥгемыт, вес тӱняш каят. Шымле ныл ий ончыч лӱшкышӧ осал сар, мондалтдыме бой, кучедалмаш-влак нерген нуно, тыныс илыш верч кучедалше кугезе кова-кочана-влак, ятыр ий эртен гынат, тачат шарнат. Тунамсе тул-вӱд вошт эртыме кажне кечыже нунылан - посна историй. Кажне историй-же - сеҥымашым лишемдаш полшышо чӱчалтыш. Чалемше ӱпан, куптыргалше чуриян илыше кодшо кова-кочана-влак тыгай историй-влакым тачысе самырык тукымлан ойлен кодаш вашкат. Нунын шарналтен каласкалымышт тений Башкортостан Республикыште «Сеҥымашын историйже-влак» патриотизм акцийлан негызым ыштен. Кугурак класслаште тунемше ӱдыр-рвезе-влак, нунын ойлымыштым видеош возен, 170 наре сюжетым ямдыленыт. Тудым республикысе рӱдӧ телеканал индешымше май кечын телемарафон семын ончыкташ тӱҥалеш.