Субботникыш рӱж лектыныт

Кудашашыже кудашеш, да... лум да ий йымач нӧргӧ ужар шудо да мотор пеледыш дене пырля теле гоч погынышо куштырат лыҥ койылалта. Мландына ойганен «ынже шорт, ынже йӧслане» манын, айдемылан йырым-йырысе вер-шӧрым, уремлам эрыктыме сомыллан пижаш логалеш.

Тыгай пашам кундемыштына ий еда тарватат. Тений гын республикыште чумыр субботникым увертареныт. Тыге кодшо шуматкечын калык рӱж пашаш кычкалте. Башкортостанысе Жилищно-коммунальный озанлык министерствын шотлымо почеш ты кечын 15960 организацийыште тыршыше 320 тӱжем еҥ субботникыш лектын. Еҥ-влак лумым кышкеныт, ийым каткаленыт, организаций-влак йырысе вер-шӧрым шотыш конденыт, шӱкшакым шупшыктеныт… Тиде кечын тӱшка вий дене чылаже 110 тӱжем кубометр шӱкшакым погымо.

Чынжымак, субботник - паша пайремыс! А. Арслановын фотожо.