Башкортостанлан - ик курым

Кодшо арнян Башкортостан Республика курымаш юбилейжым пайремлыш. Тудын лӱмеш «Башкортостан» кугыжаныш концерт залыште эртарыме торжественный погынымашке РФ Федеральный Собранийын Федераций Советшын вуйлатышыже Валентина Матвиенко, РФ Президентын Юл кундемысе федерал округшын полномочный представительже Игорь Комаров, элысе субъектлам вуйлатыше, Кугыжаныш Думын депутатше-влак толыныт.

Радий Хабировын мутшо почеш, таче республикын ончыкылыкшо, вес 100 ийыш могай ошкыл дене тошкалшашыжым шоныман. Тудо, Башкортостанна умбакыжат тӱзланыже манын, командыж дене пырля чыла ышташ сӧрен. «Тыште лу дене кӱкшӧ технологичный да наукоемкий предприятий-влак пашам ышташ, а республика шке школжо да университетше-влак дене кугешнаш, Гарвардын да Йельын профессорышт мемнан дене пашам кычалаш тӱҥалыт. Ме кӱкшӧ технологичный медицина рӱдер-влак дене кугешнаш тӱҥалына, тушто эн сай врач-влак уникальный операций-влакым ышташ, мемнан деке Израиль, Швейцарий да моло элла гыч пациент-влак эмлалташ толаш тӱҥалыт. Тӱҥжӧ - республикына йӧнан лийшаш, да тысе калык Башкортостаныште илымыж дене кугешнышаш, «Ме шкенан-влакым огына кудалте» манме шонымаш дене илен кертшаш.

Конешне, ончыкылык нерген шонкалашат тоштым. Тидым ыштыман, шонем. Шонкалымаш - тиде ончыкылык цельын образше, тудым шуктымо план. Мыланна, пагалыме коллегем-влак, республикынан кокымшо курымжын икымше лаштыклажым возаш йӧн пуалтын. Ме тушко вуйнам кӱшкӧ нӧлталын, ару чон да яндар шонымаш дене пурена. Пайрем дене, пагалыме йолташ-влак. Курымаш юбилеет дене, шочмо республикына. Ончыко, Башкортостан!» - каласен Радий Хабиров.

Пайрем концертыште 850 наре талантан еҥ мастарлыкше дене куандарен. Концерт «Россий», «Башкортостан», «Классик», «Эстрада», «Йоча» ужашла гыч шоген.