Афганистан, тачат огеш кошко шинчавӱдшӧ аван…

Тиде В.Е. Муртазинын шочмо ялже. Вячеслав Емельянович Афганистаныште 1985-87 ийлаште спецназын горно-штурмовой разведротыштыжо служитлен. 1987 ий 22 мартыште кугу кредалмаште тушманын икмыняр точкыжым пытарен. Снайперын пульыжо вуйжым нелын сусыртен гынат, пытартыш патрон марте лӱйкален да икмыняр кече гыч госпитальыште колен. Капшым шочмо ялышкыже конден тойымо. СССР Верховный Совет Президиумын Указше дене тудым Йошкар Шӱдыр орден дене палемдыме.

Таче В.Е. Муртазинын лӱмжым Кемийыште ик уремлан пуымо, школ пырдыжыште 1998 ийыште мемориал оҥам пижыктыме. Кызыт оҥам гранит дене вашталтыме, тоштыжым школ музейыш пуымо. Тений 14 февральыште ялыштыже геройым шарналтыме мероприятий-влакым эртарышт. Валентин изаже да Анатолий шольыжо толыныт ыле. Районысо Афганистан ветеран-влак ушем вуйлатыше В.Ф. Фатхинуров афган сар да тудын участникше-влак нерген каласкалыш. Туныктышо В.Я. Апсатаров геройын илыш-корныжо нерген ойлыш, тунемше-влак землякышт нерген ямдылыме шымлыме паша дене палдарышт.

Тысе шарнымаш мероприятийынат программыже школышто тӱҥале. Амалжат ситыше: тиде школышто 14 афганец тунемын. Иктыже - Йошкар Шӱдыр орденан Ю.М. Иликбаев (Вашлиймаште уке ыле.). Подвигшылан лӱмлымӧ лаштыкым туныктышо да тунемше-влак тӱткын колыштыч.

Юрий Михайлович Афганистанын кечывалвел чекыштыже - эн кугу Гильменд провинцийыште эртыше боевой операцийыште - патырлыкым ончыктен. Тыште верланыше стратегический значениян пеш кӱлешан электростанцийым пытараш шонен, душман-влак кугу наступленийым тӱҥалыныт. Десант батальон икмыняр кече обороным кучен, тыште взвод командирын алмаштышыже старший сержант Ю. Иликбаев ойыртемалтын. Неле задаче героически шукталтын, ГЭС, чыла оборудований, персонал аралалт кодыныт. Тиде операцийлан батальон командир капитан С. Гущинлан Совет Ушем Герой лӱмым пуэныт, Ю. Иликбаевым Йошкар Шӱдыр орден дене наградитленыт.

Юрий Михайлович кызыт шочмо суртыштыжо ила. Ялыште шукыжо лӱмжӧ дене огыл, «герой» манын ойлат.

15 февральыште Мишканыште салтак-интернацио-налист-влак лӱмеш чоҥымо мемориал воктене торжественный митинг лие, пайрем РДК-ште шуйныш.

Моло «афганец-влак» шочмо районышто да тӱрлӧ верлаште илат, но нунынат ӱмырышт кӱчыкем толеш, тачысе кечылан 25 афганец илыш дене чеверласен.

Афганистан ветеран-влак ушем, райадминистрацийын самырык-влак пӧлкажым вуйлатыше О.П. Биктубаева, шуко вийым пыштен, кӱлешан, суапле пашам шуктеныт. Но тӱрлӧ амаллан кӧра икмыняр еҥын лӱмжым книгаш пуртымо огыл. Южиктын лӱмжӧ пале, но тичмаш увер уке. Тиде чырым кораҥдаш автор-влак вес изданийым ешарен лукташ шонат.