Подъездым ачалаш мом ыштыман?

Ола да район администраций-влак тидын шотышто шуктышаш паша радамым пеҥгыдемденыт. Шке илыме олам, районым house.bashkortostan.ru, а илыме пӧртыштыда кунам леведышым ачалымым, лифтым але электровоштырым вашталтымым региональный операторын сайтыштыже kapremont02.ru ссылка почеш муаш лиеш. Пачер оза-влак тыгак февральын пелыже марте шке илыме пӧртыштӧ собранийым эртарышаш, подъездыште мом тӱзатыме нерген каҥашышаш да официальный полномочиян еҥым ойырышаш улыт. Подъездым ачалыме сомылыш мо пура? Подъездыш пурымаште у омсам шындат, окнам, почта яшлыкым, энергосберегающий светильникым, подъездыш пурымо леведыш козырекым, бетон тошкалтышым, пандус-влакым уэмдат. Икымше пачашыште кӱварым керамик плитка дене вакшыт, тудо пу гыч ыштыме гын - чиялтат. Подъездыште тыгак пырдыж ден потолокым, кидкучемым, люкым, мусоропроводын авыртышыжым чиялтат. Эскерыше системымат вашталташ лиеш.

Подъездым ачалыме сомыл тӱрыснек бюджет окса кӱшеш шукталтеш. Кызыт капитальный ачалымашлан тылзе еда тӱлымаш тышке ок пуро. Тиде йӧршын вес программа. Шуко пачеран пӧртлаште собранийым эртарыме нерген верысе управляющий компаний да райадминистраций-влак шижтарат. Собранийыште пӧртын чумыр кумдыкшын (мутлан, 1000 кв.м) пелыж деч утла кумдыкыштыжо илыше (мутлан, 501 кв.м) еҥ лийшаш. Уке гын, собранийым эртарымылан огыт шотло да оксам вес пӧртлан пуат.