Автомобилист ден ава-ачалан мом палыман?

Модыш площадке могай лийшаш?

Йоча-влаклан уремыште модаш йӧнештарыме комплек: курык, лӱҥгалтыш, карусель, ошма яшлык - кызытсе жаплан келшыше лийшаш улыт. Башкортостан Вуйлыкын пашажым шуктышо Радий Хабиров тошто модмо оборудованийлам уэмдаш да 17 ноябрь деч вара йӧнештарыме комплекслаште лӱдыкшыдымылыкым пеҥгыдемдаш шӱден. Модмо оборудованийлаште кидкучем ден авыртыш лийшаш, нуным ямдылыме материал-влак токсичный огыл да йӱлен кертдыме лийшаш улыт. Модмо комплексыш йоча-влакым пуртымо деч ончыч оборудований у техрегламентлан келшыме шотышто сертификацийым эртышаш. Срокшо лекме деч вара тудым, тӱз улеш гынат, площадке гыч кораҥдыман.

Йочам канаш колтеда гын

5 ноябрьыште йоча каныш шотышто у закон вийым налын. Тушто йочам канаш налше организаций-влакын ава-ачалан темлыме договорыштышт эмлалтме режимлан йӧным ыштыме, врач-педиатр улмо, ава-ачалан йочаштлан пеленышт идалык жаплан келшен толшо вургемым, йолчиемым, гигиена арверым пуэн колтымо, могай услугылан тӱлымӧ, йоча каныме верын материальный погыжлан эҥгекым кондымо годым тудым компенсироватлыме нерген пункт-влакым пуртымо.

Машинаш знакым пижыктыман

Россий Паша министерствын пунчалже дене келшышын, кызыт икымше, кокымшо, южгодым кумшо группо инвалидностян еҥ-влак (машинан озаже огытыл гынат) автомобильыш пижыктыме «Инвалид» знакым налаш медико-социальный экспертизым эртен кертыт. Ынде тудым ончычсо семын кевытыште налаш ок лий. Вашталтыш тыглай автомобилист-влаклан парковкышто инвалидлан ойырымо верым айлаш чаракым ыштышаш. «Инвалид» знакым машинам виктарыме годым веле огыл, кеч-могай автомобильыште пассажир семын коштмо годымат машинаш пижыктен але пелен кондыштарен кертыт.

БР ГИБДД-н палемдымыж почеш, кызыт машиналаште, телымсе резиным алмаштыме гынат, «Шипы» знакымат пижыкташ кӱлеш (РФ КоАП-ын 12.15 статьяже). Законым пудыртымылан 500 теҥге штрафым тӱлыктен кертыт.