Эн оҥай да сылныже - мультфильмысе Фиксик, йомак герой, икоян еш дене илыше лумкурчак-влак, «йӧратыше мужыр», спортсмен-акробат, семӱзгар дене шоктышо трио, каналташ шуйнен вочшо «лум павай» - верысе калыкым да унала толшо-влакым Юбилейный ден Комсомольский проспектлаште куандарат. Ик уремыште корным вончымо правилым текшырен шогылтшо топката кап-кылан лум павай корныеҥым «У ий дене саламлем!» манме семын ужата, а олан вес мучаштыже идалыкын символжо, весела изи сӧснаиге, пуйто тудын озаланыме ий толмылан куанен, йомартлын «тӧрштылеш». А умбалнырак «Кум сӧснаиге» йомак гыч лекше кум йолташ шкешт нерген мӱндырчынак палдарат. Южгунамже ончен ӧрат: кузе тыглай лум чумырка гыч тыгай оҥай, чонан гаяк ковыраланен шогышо модыш-влакым ышташ лиеш?
Чыла тиде, конешне, усталык шӱлы-шан мастар-влакын тыршымыштлан кӧра шочын. Лум гыч весела фигур-влакым оласе йочасад пашаеҥ, ешартыш образованийым пуышо учрежденийлаште тыршыше педагог-влак ямдылкаленыт, сылнештареныт.
А ола администраций тыгай оҥай сомылым «Лумкурчак-влакын парадышт» акций семын увертарен.
Нине оҥай фигур-влак, огыт мутлане гынат, шинчаончалтышышт, весела койыш-шоктышышт дене йоча жапнам шарналташ ӱжыт да, конешне, тыглай кечылан ямым пуртат, йырым-йырысе моторлыкым ужын мошташ таратат.