У ий дене саламлена!

- Шукерте огыл, 1 декабрьыште, предприятийна 15 ияш лӱмгечыжым пайремлыш. Тений тыгай сеҥымашке шуын кертмым мыйын гына огыл, уло предприятийын надыржылан шотлем. Ончыкыжат тӱрлӧ сеҥымаш да сай, пайдале лектыш-влаклан ӱшанен илаш тӱҥалына.

Тич поро сугынь деч посна У ий пайрем гаят ок чуч. Чыла лудшым У ий дене саламлем да йырым-йыр шуко порым, ыҥгайлыкым, савырлыкым тыланем.

- Эртыше идалык мылам шагал огыл куанле да волгыдо тат дене шарнаш кодеш. Вуйлатыме озанлыкыштем тыршыше Денис Васильевым республикыште 2018-ше ийын эн сай механизаторжо семын палемдышт, автомобиль сравочым кучыктышт. 2017 ийыште шкеже республикыште «Эн сай комбайнер» лӱмым сеҥен нальым, а тений пашаеҥем тыгай сеҥымашыш шуын! «Развитие семейных животноводческих ферм на базе крестьянских фермерских хозяйств» целевой программыш логалмымат пиал семын аклем. Программылан кӧра озанлыклан 100 шем-ола урлык ушкалым налме.

Декабрь мучаште республика Вуйлыкын пашажым шуктышо Радий Хабировын Конгресс-холлышто Посланийым йоҥгалтарымыж годым ял озанлык пашаште кузе тыршаш кӱлмӧ шотышто мыйым уло республикылан пример семын палемдымыже вучыдымо ыле гынат, чоным куан кумыл авалтыш. Ончыкыжат улшо кӱкшыт дене серлагыман огыл, умбакыжат тыршен пашам ышташ кӱлеш манын шонем!

- Мыланем У ий - эн ончычак эртышыжым иктешлымаш. Кодшо идалык мыйым сай лектышыж дене куандарыш. У ий лишемме семын пайрем кумыл утыр чотрак вияҥеш, юзо шижмаш дене вӱдылалтме шуэш, кеч тыгай ӧрыктарыше да куандарыше тат тений мыйым ончычракак авалтыш. Тыгайже илышыште чӱчкыдын огеш лий.

У ийыште шкаланем у корным палемдем, йӧршын вес шонымашым илышыш шыҥдараш тыршем. «Чолманым» лудшо-влакланат сеҥымашым, ыҥгайлыкым, пиалым, пеҥгыде да ӱшанле эҥертышым тыланем. Тек чылаштын шонымашышт шукталтеш!