«Моло деч сайрак пашам ышташ»

«Мыйым чӱчкыдын посна регионышто илышым вашталташ ок лий манын ӱшандараш тыршат. Но, мыйын шонымаште, тиде тыге огыл. Республикыштына тыматле, мастар пашаеҥ шагал огыл, нуно ышташ лийдымымат ыштат! Мый чылан тыге тыршышт ыле манын тыланем! - каласен Радий Хабиров. - Чыла еҥым тугай республикым, тугай чумыр пӧртым «чоҥаш» ӱжам, могайыште мемнан икшывына ден уныкана-влакынат илымышт шуэш ыле. Икшыве-влакын ӱмбакышт сӱмырлен кертшашлык потолокан школышто тунеммышт, еҥ-влакын поликлиникыште, многофункциональный рӱдерыште шагат дене черетым вучымышт, телым автобус остановкышто кылмен шогымышт дене сӧрасаш огеш лий. Власть пӧртлаште волгыдо да шокшо, пӧрт-влак ачалыме, корно гыч лумым эрыктыме, уремлаште, кудывечылаште ару да моло шотыштат сай лийже манын тыршышаш. Кече еда ыштыме пашаште геройло койыш уке. Республикыште илыше-влак илыш-йӱласе, но нунылан моткоч кӱлешан йодыш-влакым решатлымым вучат».

Радий Хабиров выступленийжын кугурак ужашыжым социальный йодыш-влаклан ойырен. Иктаж пел шагат коклаште Правительствылан икмыняр порученийым пуэн. Мутлан, республикыште илыше чыла ача-авалан икшывыштым йочасадыш кондыштарымылан тӱлымылан миллиард теҥге компенсацийым муаш, инвалид икшывым ончымылан пособийым кугемдаш, тыгай еш-влаклан йочаштлан реабилитацийым эртараш сертификатым ойыраш, верласе поликлиникылаште ситыдыме специалист-влакым муаш да молат. Тудо калыкым тургыжландарыше, илышнан шуко йыжыҥлажым авалтыше йодышлам тарватен, кугыжанышын обязанностьшо, школ да йочасад-влак, район да ола вуйлык-влакым алмаштыме, коррупций, чынлык, инвалид икшыве, шуко йочан еш-влаклан полшымо, инвестор верч кучедалме, мланде пашаеҥ-влакын ончыкылыкышт да шуко моло нергенат ушештарен. Ойлымыж годым мемнан пелен илыше тыглай, но тыгодымак мо дене гынат ойыртемалтше еҥ-влак денат палдарен. Ты кечын нунымат Конгресс-холлыш ӱжыныт. Каласаш кӱлеш, ойырен палемдыме еҥ-влак коклаште Калтаса район гыч палыме марий фермер Владислав Бикмурзинат лийын.

«Айста шкенам провинциаллан огына шотло! Мемнан республикына, шкенан сеҥымашна дене кугешнаш тӱҥалына! Таче ме «Моло деч сайрак пашам ыштышаш улына». Тиде ойсавыртыш мемнан девизна лиеш. Илыш кӱкшыт шотышто мемнам эртен кайыше кундем-влакым поктен шуаш тыршена гын, моло семын ок лий. Тунам ме элыште обязательно ончык лектына», - каласен Радий Хабиров, шке ойжым иктешлышыла.

«Башкортостан Республика Вуйлыкын пашажым шуктышо Радий Хабировын Кугыжаныш Собранийын - Курултайын депутатше-влаклан Посланийжын тӱҥ положенийже-влакым илышыш шыҥдараш манын, посна пашаче тӱшкам чумырена. Тушко Кугыжаныш Собранийысе чыла комитетын еҥжым ушена. Идалык мучаш марте шуктышаш мероприятий-влакым планыште раш радамлена. Тушко региональный законопроект-влакым ямдылымым, Кугыжаныш Думылан темлышаш законодательный инициатива-влакым, парламентский слушаний-влакым, кугыжаныш кучем-влакын еҥышт дене пырля «йыргешке ӱстел» йыр каҥашымашым да молымат пуртыман. Посланийысе чыла тезисын правовой негызше лийшаш. Парламент депутат-влак ончылно шындыме задача-влак серьезный да раш улыт. Нуным эффективно шукташлан законодательный да исполнительный власть орган-влак келшен пашам ыштышаш улыт», - палдарен Кугыжаныш Собранийын - Курултайын Председательже Константин Толкачев.