Сай корно, паша вер, медицина полыш…

Корным тӱзаташ

Куд ий жапыште Башкортостанысе 600 ял ден села воктенсе 6 тӱжем километр корным тӱзаташ палемдыме. Радий Хабировын шӱдымыж почеш кажне районышто шуктышаш пашам рашемдат да йодмашым ямдылат. Тыге нуным ик план-графикыш чумырат. Корным тӱзатыме сомыллан вес ийыште республикын бюджетше гыч 17 миллиард теҥге оксам ойыраш пунчалме. Эше ик миллиард теҥге оксам федерал бюджет ойырышаш.

Тунемаш йӧным ышташ

Южо школлаште йоча-влак кок смена дене тунемыт. 2025 ий марте республикыште ик смена веле кодшаш. Тыгак школлаште санузел, туалет-влакым саемдаш тений 28 миллион теҥгем ойырымо гынат, 300 заведений шке черетшым вуча, садлан Радий Хабиров 167,5 миллион теҥге оксам ешарен ойыраш палемден. Йоча-влакым школлашке шупшыкташ республика тений 142 автобусым ойырен гын, ий мучаш марте район-влак эше 130 автобусым налыт. Тиде ешартыш 70 маршрутым почаш йӧным ышта. Вес ийлан эше 170 автобусым налаш бюджетыште планым ыштыме. Радий Хабиров йӱштӧ игече годым йоча-влакым кондыштарыше автобус салон кӧргыштӧ эре шокшо лийшаш манын палемден да тиде йодышым райадминистраций вуйлатыше-влаклан шотыш кондаш шӱден. Тыгак тӱҥалтыш класслаште тунемше икшыве-влак мӧҥгӧ пӧртылаш кугурак-влакым вучымо жапыште школлаште кружок ден секций-влакым организоватлаш кӱлмым палемден.

Тазалык нерген

2030 ий марте еҥ-влак кокла шотышто 80 ийым илышаш улыт - кугыжаныш шке ончылныжо тыгай задачым шынден. Тидлан кӧра яллаште, селалаште ФАП ден больнице-влакым ачалыме сомыл ончык лектеш. Республикыште 2064 ФАП капитальный ачалымашым йодеш. Проблемым кораҥдаш аварийный режим дене пашам ыштыше ФАП олмеш кундемыште ий еда 20 наре у медпунктым чоҥыман. Радий Хабиров селалаште медицина пашаеҥ-влакым ситарыме шотышто (Илыш ончыктен: «Земский доктор» программа веле йодышым решатлаш ок полшо.) вес корным кычалаш, тыгак шушаш ийыште республика бюджет гыч тиде йодышлан ешартыш 50 миллион теҥге оксам ойыраш шӱден.

Паша лектыш

Кодший Башкортостаным паша производительностьым кӱкшемдыме да калыклан паша верым ыштыме федерал программым илышыш шыҥдарыме шотышто пилотный регион-влак спискыш пуртымо. Вес семынже, тиде проект шагалрак вийым пыштен, у технологий полшымо дене шукырак пайдам кондымо, производствышто кугурак паша лектышыш шумо дене кылдалтын. Нацпроект почеш республикыште 2,2 тӱжем еҥым у пашалан туныктымо.