Ӱдырамаш вуйлатыше-влакым саламленыт

Ты конкурсыш тений образований, медицина, ужалымаш, услуга да моло сферылаште тыршыше 19 ӱдырамаш вуйлатыше ушнен. Иктешлыме годым чолга койыш-шоктышан ӱдырамаш-влакын бизнесыште могай кӱкшытыш шумыштым, кундемын социально-экономический программыжым вияҥдымаште могай пайдам ыштымыштым, мер пашам шуктымыштым, благотворительностьым шотыш налыныт да 12 номинацийыште сеҥышым ойыреныт.

Эн тӱҥыштыжӧ - «Бизнесын корифейже» номинацийыште - Шаран села гыч «Успех» ООО-м вуйлатыше марий предприниматель Н.М. Давлетова сеҥен. Тиде предприятий верысе калыклан киндым кӱэштеш, тӱрлӧ кочкышым ыштыл ужала, чыла школласе, йочасадласе столовый-влаклан продуктым шупшыкта.

Надежда Мурзагареевнан вуйлатыме предприятий 1 декабрьыште 15 ияш лӱмгечыжым палемда. Тӱҥалтыш жапыште тудо пекарне семын пашам ыштен. Пелашыжын, Юрий Исламовичын, вучыдымын илыш гыч кайымеке, ӱдырамашлан тудын тӱҥалме куштылго огыл сомылым шке вачӱмбакыже налаш логалын. Но тудо вуйым сакен да пашаеҥ-влакым паша деч посна коден огыл, уло вийым пыштен тыршен.

Кызыт «Давлетова Н.М.» ИП, «Успех» ООО шуко профилян предприятий улыт, икмыняр кевытымат кучат. «Тиде мыйын гына огыл, уло предприятийнан сеҥымашыже. Лӱмгечына вашеш - пӱрымашын сай пӧлекше. Тыгай конкурсышто вийым тергыме годым ӱшанле эҥертыш лийшаш. Мыланем Шаран телевиденийын директоржо Раиль Хатипович Мусин уло кумылын полшыш. Конкурсыш пеленем тудо да бухгалтерийысе чыла пашаеҥем полышкалаш мийышт, мер пашаеҥ Альберт Бикбаевич Минлин машинам пуыш», - каласкала Н.М. Давлетова.

Меат Надежда Мурзагареевнам да предприятийжым лӱмгече дене шокшын саламлена. Тек пашашт ончыкыжат тӱзланен вияҥеш!