11 октябрь - Башкортостан Республикын кечыже

Тенийсе пайрем республикын курымаш юбилейже лишемме шӱлыш дене эрташ тӱҥалеш. 2019 ийыште республикылан 100 ий темме вашеш 100 объектым чоҥымо программым пеҥгыдемдыме. Тиде спискыш республиканский онкодиспансерын корпусшым, Уфасе ВДНХ воктене «Россий - мыйын историем» исторический паркым чоҥымо, «Уфа» тӱнямбал аэропортышто у терминалым ыштыме, кӱртньыгорно вокзалым уэмдыме, Уфасе М. Гафури лӱмеш академический драмтеатрым капитально ачалыме, ятыр корным, кӱварым да моло объектым чоҥымо сомылым пуртымо.

Палемдыме шӱдӧ объект гыч коло нарыжым чоҥен шуктымо. Тений Стерлитамак олаште да Бакале селаште у школлам почыт, Туймазаште универсальный спортивный ий комплекс пашам ышташ тӱҥалын, тушто ынде регион-влак кокласе да федеральный кӱкшытан таҥасымаш-влакым эртараш лиеш. Эше 50 объектым чоҥымо паша умбакыже шуйна.

Мишканысе марий историй да тӱвыра рӱдерым, Агидель оласе тӱвыра рӱдерым, Стерлитамакысе тӱвыра да искусство колледжым капитально ачалаш оксам ойыреныт, а Аскинысе, Благовещенскысе, Дӧртыльысӧ, Мияке да Зилаир районласе тӱвыра пӧрт-влакым ачалаш йодмаш-влак шотышто эше пунчалым луктын огытыл. Юбилей идалыкыште республикыште Тӱнямбал йоча модыш, а 2020-шо ийыште Тӱнямбал фольклориада эртат. Тунам Уфасе гына огыл, моло олаласе да районласе тӱвыра пӧрт-влакат ӧрдыжеш огыт код.

2019-ше ийыште республикын юбилейже дене пырля Мустай Каримын да Мажит Гафури лӱмеш Башкир академический кугыжаныш драмтеатрын шӱдияш, Файзи Гаскаров лӱмеш калык куштымаш ансамбльын 80 ияш лӱмгечыштым эртарат.