Нефтекамск 55 ияш лӱмгечыжым палемдыш

Пайрем мероприятий-влак эр гыч кас марте шуйнышт. Лу шагат лишне, эше кече шыратен ончалме годым, оласе калык чылан гаяк Ленин уремыш чумыргаш тӱҥале. Тушто, ола администраций шеҥгелсе паркыште, фонтан воктене, каныме мотор верым почыч. Тудым «Нефтекамскыште 2018-2022-шо ийлаште оласе средам вияҥдымаш» программа дене келшышын тӱзатыме. Оласе калыкым пайрем дене саламлаш Башкортостан Республика Правительство гыч уна-влак - еш, паша да калыкым социально аралыше министр Л.Х. Иванова, промышленность да инноваций политика министр А.И. Карпухин - толыныт ыле. Ужар аллейыште сӧрастарыме «Нефтекамскысе арбат» искусство выставкым нуно кӱкшын аклышт. Выставкыште верысе художник, кидмастар-влакын оҥай деч оҥай пашаштым ужаш, поэт ден музыкант-влакым колышташ лийын. Нунын коклаште Бирск район Кужнур ял гыч марий график Ефрем Калимьяновын пу гыч пӱчкеден ыштыме ӱзгарже-влак да Нефтекамск оласе самырык художник Роман Ислаевын картиныже-влакат моткоч чаплын койыныт.

Рӱдӧ площадьыш куснышо пайрем кумылым эркын шывыше йӱр пырче-влакат амыртен ышт керт. Площадьыште Нефтекамск оласе тӱрлӧ предприятий, тӱвыра, образований, спорт учреждений-влакын коллективышт парад дене ошкыл эртышт. Колоннышто чинче-вунчо тӱсан вургем дене ошкыл эртыше оласе тӱрлӧ калык пайремым поснак волгалтарыш.

Тиде площадьыштак фольклор коллектив-влакын усталык концертышт талышныш. Руш, татар коллектив-влак дене пырля Калтаса район Келтей ял гыч толшо «Умыр кас» да Дӧртыльӧ район Чарлак ялын «Олык пеледыш» ансамбльышт марий калыкын тӱвыра поянлыкше дене палдарышт. Кумылан-влак нунын мурсемышт почеш шывыше йӱр йымалнак рӱж кушталтышт.

Оласе тӱвыра да каныш паркат тиде кечын йӱк-йӱан дене темын ыле. Тушто предприятий-влакын ямдылыме «Чапле паша олам чапландара» да «Нефтекамск - мыйын суртем, мыйын ешем!» пеледыш выставка шинчам куандареныт. Тиде кечын рӱдӧ каныш паркыште у аллейым почыныт. Пайремын торжественный ужашыже кугу сценыште эртыш. Тушто Нефтекамск олам вияҥдыме сомылыш шагал огыл вийым пыштыше, олан историешыже кышам кодышо пагалыме еҥ-влакым кугыжаныш награде дене палемдышт.

Нефтекамск олалан 55 ий теммылан пӧлеклалтше пайремым пелйӱд марте оласе мурышо-куштышо коллектив-влак сӧрастареныт, «Шӱдыргорно» верысе ӱдырамаш мурышо ансамбль да Уфа, Казань, Йошкар-Ола гыч ӱжмӧ эстрада шӱдыр-влакын мурсем пӧлекышт лӱмгече пайремлан волгыдо у шӱлышым пуртен. Марий кугыжаныш филармонийын мурызыжо-влак Вера Соболева да Светлана Яндукова паркыште лыҥ погынышо калыкым сайынак «ылыжтышт». Олан лӱмгече пайремже калык дене йӱдымсӧ салют дене чеверласыш.

Л. ШАВАЛИЕВА.

Снимкыште: Рӱдӧ площадьыште чолга марий ӱдырамаш-влак ошкыл эртат.