Икте-весым шарнен илыза

Тений пырля тунемме йолташем-влаклан 70 ий темеш. Тиде кугу лӱмгече. Кажне вич ий мый йолташем-влакым тиде волгыдо пайрем дене саламлем. Мый шкеже Мишкан селаште шочынам, но йоча да самырык жапем У Памаш ялыште эртеныт. Йоча годым, кунам икте-весым кечын вашлият, тунемаш, мӧрым, ломбыгичкым погаш пырля куржталат, йолташ-влакын нимо деч шерге улмыштым от умыло. А кунам ойырлен шаланен пытена, шӱм-чонна нуным кычалаш тӱҥалеш. Нунын кузе илымыштым эре палыме шуэш. Синя, Зоя, Нюра, Аля, Аня, Маня, кок Алина, ныл Лиза, Нина, Борис, Гена, Саша, Семен, Саня, кузе пырля школыш тунемаш коштынна, шарнеда? Йолташем-влак, ынде чылан гаяк кова-коча, южыда кугезе кова-коча улыда. Мый илышыштыда вурс гай пеҥгыде тазалыкым, кужу ӱмырым, вуй ӱмбалныда волгыдо кечым тыланем. Коштмо корныда рыскалан лийже. Айста умбакыжат икте-весынам огына мондо, ончычсо гаяк ваш-ваш миен-толын илена.

Мишкан район.