Вашталтеш, уэмеш Лапкашор

Кеч-могай ялыш каяш тарванет гынат, эн ончыч шоналтет: «Пураш-лекташ лиеш гын? Йӱр йӱреш гын, мом ыштыман?» Ик-кок ий ончыч туларем деке унала мийымем годым ялыш пурымо да урем корнылам ончен палемденам ыле: Лапкашорышто 30-35 ий коклаште пӧрт-влак деч моло нимат вашталтын огыл. Кеҥеж покшелнат лавыран, корно лаке-луко лийын пытен. Унала мийыме годым эн ондак «Кузе кок километр корным пурем, пурем гын, кузе лектам?» шоненам. Шошым-шыжым, ойлыманат огыл, йӧршын коштшашлык огыл ыле. Кеҥежымат эре кавам эскераш верештын: шем пыл койын гын, вашкерак погынен лектын каяш але машинам корем гоч сӧреман верыш луктын кодаш тыршалтын. Телым унала мийыше-влакым ужатен колташ километр дене лумым куалтын. Поран шке пашажым ыштен.

Кызыт кугорно гыч Лапкашорыш савырнышым гын, могай сӱрет почылто! Кумда, тӧр, у асфальтан, шыма корно. Ончыч ялыш пурымо деч ончыч куштыра дене темше корем вашлиеш ыле гын, кызыт коремым волыман-кӱзыман огыл, тӧр корно денак уремыш пурыман. Коремым эрыктеныт, ял уремысе пече-влак, тӱрлӧ чия дене волгалтын, шинчам куандарат. Пуста пӧрт-влак йырат моторын чиялтыме пече-влакым шогалтыме. Пуйто урем тӱҥалтыште ял оза толшо-влакым «Пагален ӱжына» манын вучен шога.

Лапкашорышто илыше-влакын пиалыштлан куанен, Маркс туларем дек миен пурышым. Ял уремыште асфальт огыл, но, тӧрлен, ошмам пыштыме. Тиде уже шӱдӧ пачаш сайрак урем корно. Эше туларем увертарыш: ӱмаште ялыште, пучым вашталтен, кажне суртыш вӱдым пуртышт, телым корным эрыкташ, кеҥежым шудым, олымым кондаш да моло пашалан сельсовет пижыктыме оборудованиян ораван тракторым налын.

Путырак моторын коеш Лапкашор урем. Ял калыкын корно укелан ятыр ий индыралтмыжым шотыш налаш гын, тиде кугу пиал! Ынде кеч-могай уна, йӱрым-лумым ончыде, Лапкашорыш эркынлен толын да каен кертеш. Тендан куанланда Анач, Чаке, Марин, Октябрь яллаште илыше марий-влакат йывыртеныт. Сай корныдам арален, куанен, таза-эсен кудалыштса!

Ф. БАЙТУКОВ.