Шочмо кечет дене, йочасад!

Тӱжвал тӱсшӧ дене тӱрлӧ чиян улмыжлан кӧра мӱндыркӧ волгалт шинчыше Нефтекамск оласе «Семи-цветик» 39-ше йочасад 2 февраль кечын поснак сӧралын койын. Амалже - тиде кечын йочасад кокымшо гана «шочмо кечыжым» палемден - капитальный ачалыме пашам эртарыме деч вара тудо уэш омсажым почын. А ачалыме паша тыште кум ий наре шуйнен - тудым, «Башнефть» компанийын ойырымо окса кӱшеш 2015-ше ий августышто тӱҥалмеке, 2017-ше ий декабрьыште мучашленыт. Ачалыме пашам шукташ йочасадлан тыгак БР Правительство да Нефтекамск оласе Социальный целевой программа-влакын фондышт полшеныт. Тыге тиде сомыллан чумыржо 120 миллион теҥге утла шийвундым кучылтмо. Йочасад тӱжвал сынже денат, кӧргӧ моторлыкшо денат чынжымак поян, моткоч сӧрал да кызытсе илышлан келшен толшо лийын шогалын. Корпуслаштыже экскурсий дене эртыме годым чыла тидым шке шинча дене ужын аклаш йӧн лие. У оборудований, у технологий дене йӧнештарыме медпункт, прачечный, изолятор, кочкышым ямдылыме блок, методкабинет, йоча-влаклан заниматлаш спорт, музык, краеведений зал, малыме да модмо пӧлем-влак, корныласе правил-влакым тунемаш посна вер - чылажат изи ньога-влаклан шуаралт, тачысе илышыште шкем ласкан шижын кушкаш йӧным ышта. Коммуникаций системым чыла уэмдыме, вашталтыме. У материал дене вакшме шокшо кӱвар, пластик окна, пожар лийын кертме деч аралыше линолеум да молыжат - чыла СанПиНын йодмыжлан вашешта да йоча-влакын тазалыкыштым аралаш полша. Тиде районышто илыше да «Семицветик» йочасадыш коштшо йоча-влак шкештат, нунын ава-ачашт, воспитатель, учрежденийыште тыршыше моло пашаеҥ-влак пайрем кечын куаныштым ышт шылте. Нуно йочасадым уэмдыме сомылыш вийым пыштыше-влаклан таумутым ойлышт, шке ямдылыме концертыште усталыкыштым ончыктышт. А пайремыш толшо кугу уна-влак ятырак ыльыч - тиде БР Образований министерствын пашаеҥже А. Минуллина, БР-ысе Социальный целевой фонд-влакын директорышт А. Нугуманов, Нефтекамск ола администраций вуйлатышын социальный йодыш шотышто алмаштышыже И. Ахмадишина да молат. Йочасад вуйлатыше Л.Н. Низамутдинован мутшо почеш, тиде учрежденийыш 745 икшыве коштеш, пашаеҥ-влакын чотышт 106-ыш шуэш. Очыни, нунылан да апрельыште 30 ияш лӱмгечым палемдаш ямдылалтше йочасадлан тиде - эн сай пӧлек.

Л. ШАВАЛИЕВА.

Снимкыште: Йоча-влак тауштыме номерым пӧлеклат.

Авторын фотожо.