У ий - воштончыш гай. Тудо чыла почын ончыкта

Ачам ожно тыге ойлен: «Пайремыш шым тӱрлӧ еҥ толеш. Иктыже - кочкаш, весыже - йӱаш, кумшыжо - ончен шинчаш, нылымшыже - манеш-манешым колташ, визымшыже - воштылташ, кудымшыжо - ешым пужаш, шымшыже - шолышташ». Тидыже чынак улмаш. Сайже гыч тӱҥалам. 30 декабрьыште Йывангасола культура пӧртыштӧ калыклан У ий пайремым эртарышна. Мурышт-куштышт, музикан сем почеш «кандырам пунышт», пеш шуко тӱрлӧ модыш дене модыч. Лумӱдыр ден Йӱштӧ Кугызам вашлийыч, почеламутым каласкалышт, нунылан мурым муралтышт. Лотерей модмаште куанен шинчышт. Ты пайремым эртараш тений мыланна предприниматель Лидия Алексеевна Костина да Афганистаныште служитлен толшо сарзе, кызыт водительлан ыштыше Павел Витальевич Коротков уло кумылын полшышт. Нунылан пеҥгыде тазалыкым, эн мӱндыр корно дечат кужу ӱмырым, вий-куатым, чолга да тыгаяк поро кумылан лияш, курым мучко куанен илаш тыланена.

А аламарак пашаж нерген тыгерак тӱҥалам. Кажне еҥ - шке паша верыштыже оза. Кушто мо верланен - чыла ужеш, пала. Паша лектышыжым ончыкташ фотостендым ышта, клуб кӧргыштӧ эре волгыдо, мотор, шокшо лийже, окнаште пеледыш пеледше манын тырша. Пайрем сайын эртыш. Йӱшыжат, воштылтышыжат, ончен шинчышыжат да шолышташ шонен толшыжат лийыныт. Мемнан Йывангасола клубышто кеҥежше-телыже пеледыш пеледеш. Кызыт гын «декабрист-влак» поснак одарланеныт. Нуным ме елкым эртарыме пагытлан шкаф вуйыш кӱзыктен шындышна. Тыгай лӧза пеледышым кӧн дыр шинчаже ужын, кидше налын. Эх, кӱчымӧ чонан айдеме, кидет-йолет модеш гын, молан вара шке суртыштет пеледышым от шынде? Молан шолышташыже, а? Тыгай осал койышдам луктын шуыза. Марий калыкын лӱмнержым ида шӱктӧ, культурыжым нӧлтыза. Шкежат эре ончылно лияш тыршыза.

У ий да Шорыкйол пайрем дене чыладамат шокшын саламлем. Илышда муро гай йоҥгыдо, кече гай волгыдо, вурс гай пеҥгыде, пеледыш гай эреак сӧрал, памаш вӱд гай яндар лийже. Пеленда эреак пагалыше да йӧратыше, умылен моштышо да полшен шогышо лишыл еҥда-влак вычыматышт.

Л. АЛЫНБЕКОВА, Йывангасола тӱвыра пӧртын вуйлатышыже.

Снимкыште: Пайремын весела татше.