Пий идалык толеш. ГАВ-ГАВ! Кӧ кӧлан йолташ лиеш?

Пий - айдемылан йолташ, маныт. А айдеме пийлан кӧ улеш? Шушаш ийын тидым рашемдаш шонена, вет мландӱмбаке Пий идалык лишемеш. Эскерымем гыч шижам: кӧ йӧрата - тудо пийым ашна, йолташ семын ужеш. А кӧ ок йӧрате - тудо шке пий гай улеш, садлан ныл йолан йолташым ок ашне. Икана капкаште «Осторожно, злая собака!» манын возымо пий вуян табличкым ужымат, семынем озажым мокталтен шоналтышым: «Могай поро кумылан айдеме, толшо-влак нерген коляна, шекланен пураш йодеш».

Капка дек лишемым. Пий опталтыме йӱк ок шокто. А табличке йымалне пор дене ешарен возымо: «И хозяин злой, и жена злая, и дети злые!» Пураш але савырнен каяш? Тошкешт шогем. Сомыл дене миенам ыле. «А-а, - шоналтышым, - осал ваштареш тоям налман. Ончена, кудына лӱдыктен сеҥа!» «Предупрежден, значит, вооружен» маныт тыгай годым.

Кудывечыште орен оптымашат ыш ылыж, кержалташ ямдылалтше пият ыш кой.

Кудыш пурен шуым. Озаже гын путырак поро, кумылзак да мыскараче улмаш. Пийже укеат, лӱдыктышӧ табличкым капкашкыже лӱмын сакен. «Пий олмеш арала, - манеш. - Порым тыланышым пурта, а осалым шонышо савырнен кая, садланак пор дене шке гыч ешарен возен коденыт».

Мый гын шушаш идалыклан тыгай девизым темлынем: «Пийым йӧратыше-влак, ушныза!» Арамлан огыл почеламут корныла шочыныт: «Еҥ нерген мыняр шукырак палем, тунар пийым йӧратем».

Чем больше узнаю людей,

Тиде корнылам возышо семын тӱрлӧ еҥым - Мери де Рабютен-Шанталь де Севиньем, Генрих Гейнем, Антон Чеховым да молымат - ушештарат. Кӧжӧ-гынат шочыктен, а молышт цитата семын кучылтыныт, да тыге калыкыште шарлен. Но тӱҥжӧ икте: пийын ӱшанле, поро улмыжым айдеме койыш дене таҥастараш гын, кызытсе курымыштат вашталтыш уке, манаш лиеш.

…У ий лишемеш. Туддеч шуко оҥайым, ӧрыктарышым, но чыла сайым гына вучена, икте-весыланна порылыкым да волгыдым тыланена. Айста Пий идалыкыште, тудын койыш-шоктышыжым эскерен, шкаланна кӱлешан иктешлымашым ыштена да, пий гай ырлен-кредалын огыл (Тиде йоҥылыш умылымаш.), а пий гай ӱшанле (шкенан калыкланна, йылмыланна, шочмо верлан, икте-весылан), поро лияш да тыматлын илаш тунемына.

Тидын шотышто шушаш идалык гыч конкурсым увертарена. У ий пайремым кузе вашлийме гыч тӱҥалын, умбакыжат илышыште шкендан дене але иктаж-кӧ весе дене лийше, пий дене кылдалтше ӱшан, порылык да моло оҥай случай нерген видеороликым, фотосӱретым (мутлан, «Эн мотор пием»), мыскарам возен колтен кертыда. Конкурслан шке гыч оҥай номинацийым темлышын ойжымат шотыш налына. Кунам иктешлымашым ыштыме нерген, лудшо-влак дене каҥашен, варарак увертарена. Возымо да фото-,

видеоматериалым почто гоч, тыгак редакцийын электрон адресышкыже ([email protected]) але газетын ВКонтакте лаштыкышкыже колтен кертыда. Шушаш У ий дене!

И. ГУБАЕВ.