Пайрем дене, колледж!

Тиде тунемме заведений 1992-шо ий 5 октябрьыште шочын - 150-ше профессионально-технический училище «Мишкан» совхозын отделенийже негызеш почылтын. 2011-ше ийыште училище лицейыш савырнен, 2014-ше ийыште - колледжыш. Ондак тыште кум группа лийын: механизатор, строитель да штукатур-маляр-влак. Ик жап гыч слесарный мастерскойым, автомобиль ден ял озанлык техникым олмыкташ туныктымо класс-влакым почмо. Тачысе кечылан колледжыште 7 профессийлан 360 еҥ тунемеш. Базыже пеҥгыде - тӱрлӧ мастерскойжо-влак, автодромжо, трактородромжо, тӱшкагудыжо, столовыйжо, 800 гектар мландыже, мӱкш отарже улыт.

25 ий тунемме заведенийым РФ профессиональный образованийын почетан пашаеҥже, БР Образованийын заслуженный пашаеҥже, БР Образованийын отличникше

В.Т. Байбулатов вуйлата. Педагогический коллектив ял озанлык пашан престижшым кугемдыме верч вийжым чаманыде тырша. 25 ий жапыште 5 тӱжем утла специалистым туныктен лукмо.

Чынак, колледжым тунем лекше студент-влак илышыште огыт йом, сай специалист улыт.

Пайремышке РФ Кугыжаныш Думын депутатше Р. Баталоват толын. Рима Акбердиновна районысо самырык-влакын республикысе спортым вияҥдымашке изи огыл надырым пыштымышт нерген ойлен да ече комплектым, фитнес ден аэробикылан инвентарьым пӧлеклен.

Колледжын директоржылан, коллектившылан, студент-влаклан пеҥгыде тазалыкым, пашаштышт да тунеммаштышт сеҥымашым Мер каҥаш ушемын председательже Э. Александров, педагогика наука кандидат, МарГУ-што туныктышо А. Ишалин да молат тыланеныт, пайремым верысе Культура полатын пашаеҥже-влак да «Эрвел» куштышо калык ансамбль сӧрастареныт.

Е. МАТВЕЕВА.