Пайрем чонеш волгыдо шижмашым кодыш

Калмаш ялын школыштыжо пайрем лӱмеш сӧрастарыме залыште шинчаш верат ситен огыл. Концертым вӱдышӧ Роза Михайловна Ибаева почо. Нылымше классыште тунемше ош суксо гай ӱдыр-влак «ийын» лектыч, вара рвезе-влак йошкар шар дене куштымашке ушнышт. Авалан пӧлеклыме куштымаш шинчавӱдым лукто. Кокымшо классыште тунемше йоча-влак тул гай ылыжтен кертше «Летка-Ленька» куштымашым ончыктышт, зал рӱж совым кырыш.

Кова да уныка нерген воштылчык сценкым библиотекарь Евдокия Мазитова ден нылымше классыште тунемше Александр Мурсакаев ончыктышт. Эдгар Шангареев, Злата Ибаева кова, ава-влак нерген почеламутым чаткан каласкалышт.

Изинек мураш, кушташ йӧратыше ӱдыр Елена Мазитова кова-влаклан мурым пӧлеклыш.

Мыскара куштымаш ончышо-влаклан поснак келшыш. Тунемше-влак Илья Головко ден Анна Султанова мыскара йӧре муренат ончыктышт. Кирилл Шаяхметов ден Елена Мазитова нунын деч вараш кодын огытыл - «Кечырий» мыскара мурым йоҥгалтарышт, уста артист-влак семын модын ончыктышт. Кажне художественный номерлан сценым посна сӧрастарен келыштарыме ыле. Л. Островская, Р. Михайлов, Л. Искакова рэпым лудыч, у муро-влакым пӧлеклышт. Концертым тӱҥалтыш класслаште тунемше-влакын вийышт дене туныктышо-влак Снежана Васильевна Шакиева, Роза Михайловна Ибаева, библиотекарь Евдокия Каметовна Мазитова ямдыленыт.

Кажне номерлан костюмым ургымо. Ӱдыр-влакын вургемыштым сӧрастараш тӱрлӧ резинкым да вуеш чийыме теҥге-влакым библотекарь

Е. Мазитова мастар кидше дене ямдылен. Концерт хор дене мучашлалте.

Вара тӱшкан чайым йӱаш погынышт. Калмаш школышто шуко жап тыршыше, сулен налме канышыш лекше

Л. Мурсакаева усталык кружокым почаш темлыш. Тек тиде шонымашышт шукталтеш.

О. МУРСАКАЕВА.

Снимкыште: Авалан пӧлеклыме куштымаш кажнын чоным тарватен.