Эн ныжыл, поро да лишыл...

Нефтекамск оласе тӱвыра рӱдерыште Аван кечыжлан пӧлеклыме пайрем Шуматбаевмытын ешышт дене палдарыме гыч тӱҥале. Лу икшыве гыч вич изиракше авашт йыр сценысе диваныште чумырген шинчыныт (снимкыште). Вӱдышын йодышыжлан чулымын вашештат. Кажныжын вургемже ойыртемалтше, кап-кылыштышт пеш чаткан коеш. «Ой, вургемда моткоч мотор! Могай кевытыште налында?» - йодо концертым вӱдышӧ ньога-влак деч. «Авай шке урген!» - рӱж вашештышт нуно.

Анжела ден Сергей Шуматбаевмытын ешыштышт чылажымат шке кид дене мастарын ыштен моштат да икшыве-влакымат тидлан изинек туныктат. Озавате ургаш гына огыл, тӱрлаш да моло сурт сомылланат уста, йочаже-влакат тудын гай лияш тыршат. Ӱдыр але эрге, изи але кугу улыт - ургенат, тӱрленат, пижерге ден носкимат пидын моштат. «Кушеч тыгай тыршымаш, чыла ыштен моштымаш, ныжыл кумыл дене авалтен, йоча-влакым чын ончен куштымаш? Тыгай ава лияш мо полша?» - вӱдышӧ адак, ӧрмалгенрак, йодышым пуыш. «Аваже могай, ӱдыржат тугай, - тыматлын каласыш Анжела Александровна. - Тидлан мыйым авам тӱҥалтыш класс гычак туныктен куштен. Чыла ава деч шога. Мыят ӱдырамаш порысем тичмаш шукташ тыршем». (Аваже - Зинаида Сайрановна Новикова. - авт.)

Шуматбаевмытын икшывышт школыштат сайын тунемыт. Кугуракышт йол ӱмбак шогалыныт, пашам ыштат. Ача-авалан кажныж дене кугешнен илаш гына кодеш. Еш пиал пашаче шӱлыш да тыршен тунеммаш гыч тӱҥалеш.

И. ГУБАЕВ.