Мӱй кочмо годым тамле

Кызыт мӱкшым ашныше-влакым тӱҥ шотышто частный озанлыклаште вашлияш лиеш. Нуно шагалын огытыл, но опытанжым парня денат шотлен кертына. Мӱйым налме деч посна мӱкш продукций калыкын тазалыкшылан пайдале улмым кугыжаныш кӱкшытыштӧ умылышаш улыт, посна еҥ-влакын тыршымышт дене гына ончыко каяш огеш лий. Тыгай шонымаш дене 10-11 ноябрьыште Киров олаште мӱкш ончышо-влакын «Вятка» областной мер организацийыштым ыштымылан 40 ий темме лӱмеш регион-влак кокласе III съездым эртареныт. Тушко Российын 15 кундемже гыч мӱкшызӧ, специалист, шанчыеҥ да тӧра-влак миеныт. Докладым ыштыше-влак мӱкш ончымаште лектын шогышо проблемылам тарватеныт, ятыр темлымашым ойленыт. Шкенан да йот элласе опытым кучылтын, тӱшкан тыршен веле мӱкшым кӱлешан насекомый семын арален кодаш лиеш. Мӱкшызӧ-влакым ял озанлыкыште моло сатум ыштен налше-влак дене иктӧр ужаш, нунын коклаште кылым ышташ кӱлмым палемденыт.

Российыште «Пчелопром» ушемым пытарыме деч вара мӱкш ончымо пашам кӱлеш семын виктарыше кучем уке гаяк. Тиде сомылым Россий Ял озанлык министерствын вольык ашныме да урлык паша департаментше шуктышаш. Туштыжо, палемденыт съездыште, эсогыл келшыше специалистыштат уке. А ожно тиде пашам палыше да виктарыше еҥ районысо ял озанлык управленийыштат лийын. Южо регионышто мӱкш ончымо паша шотышто посна законым лукмо, а федеральный кӱкшытыштӧ тыгай проект Кугыжаныш Думыш але мартеат миен шуын огыл.

Мемнан республика гыч мӱкшызӧ-влакын съездышкышт Мишкан район Тӧргымдӱр ял гыч В.Н. Зайниевым ӱжыныт. Пытартыш ийлаште тудын паша опытшо мӱкш ончышо практик-влак коклаште веле огыл, тиде отрасльысе шанчыеҥ-влакланат кумдан палымыш савырнен. Вениамин Николаевичын урлык пашам шуктымо, мӱкш-

авам лукмо нерген ыштыме докладшым тӱткын колыштыныт да кӱкшын акленыт. Тудын 38 ий тыршыме паша опытшым шымлаш вес кундемла гычат ик гана веле огыл толыныт, кугу форумлашкат эре ӱжыт. Докладшым кӱчыкемден савыкташ гынат, газет лаштыкыштына вер ок сите. Кӧлан оҥайын чучеш але палаш кӱлешанлан шотла, шкеж дене вашлийын кертеш.

И. ИВАНОВ.

Снимкыште: В.Н. Зайниев (пурлаште) да Пӱнчер ял гыч Э.А. Алексеев съездыш мийымышт годым.