Пырля-пырля чыла ушна

Шаран селасе РДК-ште марий культура кече эртыш. «Чолман» газетлан подпискым увертарышна. Чылаже 29 еҥ возалте.

Залым книга, фотостенд, альбом, марий калыкын кидпаша выставкыж дене сӧрастарыме ыле. Пайремыште меат, кова-кочанан илыш-йӱлажым шотыш налын, пагалыме уна, родына-влакым мелна дене сийлен вашлийна. Мемнан Шаран кундемын Ш. Булат, Д. Исламов, П. Глезденев, марий ученыйна-влак Б. Атнабаев, Д. Миндияров нерген Р.И. Минлигалина радамлен ойлыш, вара Г.Е. Ахметшина кидпаша-влак дене палдарыш. Тиде В. Минликаеван (Янахмат ял), Л. Шамыкаеван, Ш. Батыргарееван, С. Атнашеван, З. Ильгузинан (Усола ял), Э. Минлигалинан (Биктыш ял), Г. Байсаринан (Тумбагуш ял) пашашт. Тӱрлӧ верыште илыше марий-влакын вургемыштым 21 еҥ ончыкташ лекте. «Ош пеледыш» ансамбльын участникше-влак Тувыртыш пайрем гыч ужашым ончыктышт. Марий культур кече пайремыште районысо культура да самырык-влакын политикышт пӧлка вуйлатыше А.И. Габдуллин, район Советын секретарьже Р.А. Якупов, марий мер автономийым вуйлатыше А.Б. Минлин, туныктымо да мер пашан ветеранже А.А. Асмаев, РОО-н методистше Г.Ф. Галимова ойлышт. Гульчира Фаиловна марий йылме дене возымо сочинений-влакым иктешлыш да марий йылмым да литературым туныктышо-влак В.А. Гибадуллиналан, Л.М. Шамыкаевалан, Н.А. Минлиналан Тауштыме серышым кучыктыш.

Концерт программыште «Элесия» мурызо группа, «Ош пеледыш» калык ансамбль, «Ритмы Шарана» йоча ансамбль, З. Исламова, В. Мустаев, С. Ишинбаева, Л. Шамыкаева ден Л. Ташмурзина, Виктория ден Полина Миликаевамыт, Т. Каштанова ден В. Атнагузина мурышт, куштымашышт дене калык чоным куандарышт.

Концерт годым «Чолман»газетлан подпискым ыштыше-влак коклаште пӧлеклан модмашым эртарышна.Пиал кум еҥлан - Г. Ахметшиналан (Акпарс ял), З. Ильгузиналан (Усола ял), З. Исламовалан (Шаран села) - шыргыжале. Шуко чолга марийлан тауштыме серышым пуымо. Тыгак марий вургем дене толшо-влаклан конкурсым эртарыме, пӧлекым кучыктымо. Толшо калык викториныланат вашмутым кычале. Марий культур кечына сайым эртыш, «кандыра» куштымаш дене мучашлышна. Пайремыш марий кочкыш-влакым ямдылен кондымыжлан Н. Давлетовалан, Акпарс, Тумбагуш школ туныктышо-влаклан, библиотека пашаеҥ-влаклан кугу таум каласыме шуэш.

Л. ШАМЫКАЕВА.

Снимкыште: Лудына, ойлена, мурена - шкеак кумылнам нӧлтена.