Чылан «Чолманлан» возалтыныт

Сентябрь тылзе гыч почта пашаеҥ-влак подписка тургымым увертарышт. Но пытартыш ийлаште, очыни, нунын тӱҥ показательыштлан мыняр газет-журналлан возыктымым огыл, мыняр сатум ужалымым да тыге мыняр оксам ыштен налмым шотлат. Садлан марий яллаште пашам ыштыше почтальон-влакат калык дене мутланыме годым шочмо йылме дене савыктыме могай изданийлан подпискым ышташ лийме нерген шуэнрак ойлат але южгунамже йӧршынат мутым огыт лук. Адакше кунам умыландарен шукташ лиеш, нунылан утыжым тӱлышаш ынже лий манын, арнялан кум кечым гына пашам ыштыктатыс…

Садлан, пагалыме лудшына-влак, республикыште марий йылме дене лекше газетын пӱрымашыжым шке виктараш тыршаш логалеш. Шарнеда чай, икмыняр арня ончыч подпискым шке коклаште тӱшкан ышташ темленна ыле. А теве Мишкан район Нерге тӱвыра пӧртысӧ «Ӱжара» калык ансамбльын мурызыжо-влак (снимкыште), редакций пашаеҥ-влакым вучыдеак, чылан «Чолман» газетлан возалтыныт. «Вес ий луынат республикысе марий газетым лудаш тӱҥалына. Пӧлекым модмашке ушнаш квитанцийын копийже-влакым ямдыленна, вашке гыч колтена», - редакцийыш йыҥгыртен каласыш верысе Ветеран советым вуйлатыше, ансамбльыште ятыр ий годсек мурышо М.А. Гареева. Тау, куандарышда! Умбакыже нунын радамыш кӧ ушна? Подписчикын кечыжым пайрем семын эртараш кумылда уло гын, возыза, йыҥгыртыза, увертарыза!