Марий дизайнер Россий конкурсышто сеҥен

Евгения Кошкина Марий Элыште, Волжский район Купсола ялыште шочын-кушкын, кызыт Приволжский поселкышто ила. Йошкар-Оласе талантан икшыве-влаклан икымше интернат-школын художественный пӧлкаштыже тунемын.

Кызыт мастар ӱдырын кидпашажым Марий Элыште гына огыл, Интернетлан кӧра тӱнямбалнат палат. Сылне марий тӱр да тамга дене сӧрастарыме вургемжым, сумкаже-влакым, оҥай шийдарманжым моло кундемлаштат йӧратен налыт. Шуко пашажым Германийыш, Израильыш, Америкыш, Австралийыш колтен.

Молан йот элыште илыше-влаклан марий сынан вургем кӱлеш? «Кажне пашаш мый усталыкым гына огыл, кумылем пыштем, - ойла Евгения. Кажне кечын чийыме мотор марий тӱран вургем фабричный деч йӧршын ойыртемалтеш, кумылым нӧлта. Адакшым уло тӱнялан ик экземпляр дене веле улыт, садлан нуным кӱкшын аклат».

Марий дизайнерым тӱрлӧ конкурсышто вийым тергымылан кӧра шуко вере палат. «Этно-Подиум» деч вара Евгения Кошкина вигак Удмуртийыш кая, варажым уэш Москошко толеш. Конкурсышто участвоватлымыже тудлан усталыкшым у кӱкшытыш лукташ да модный тенденцийым эскерен шогаш полша. «Чыла усталыкем марий тӱвыра, марий йӱла дене кумылаҥын, садлан тиде йӧратымашемым мый ӱдырамаш-влаклан мотор, оҥай вургем, сувенир да шийдарман гоч йывыртен пӧртылтынем», - манеш Евгения.

Е. МИНИЛБАЕВА.

Снимкыште: Е. Кошкина.