Ончыкылык тукымым кушта

Ульяна Александровна Чорай школышто 30 ий утла, 1984 ийыште Н.К. Крупская лӱмеш Марий кугыжаныш пединститутым тунем лекме годсек, тырша. Творчески пашам ыштыше туныктышо урокышто тунемше-влакым сылнымутан произведенийлам лончылаш, аклаш, илыш дене кылден мошташ туныкта, шуко лудаш кумылаҥден шога. Шке шонымашыжым ок тушко, учебникыште улшо ямде иктешлымашлан ок эҥерте, ӱдыр-рвезе-влакым шке шонкалаш, чын иктешлымашке шуаш туныкта.

Кӱлеш годым поро шомак да мыскара дене, шыргыжал ончалын, нойымым мондыкта, икшыве-влакым умбакыжат кыртмен тыршаш кумылаҥда. Тыршымыштын лектышыжым ужын, йоча-влак урок гыч шуко ыштен шуктымылан, уым пален налмылан куанен лектыт.

Ульяна Александровнан тӱрлӧ творческий пашам эртарымыже, посна система почеш сочиненийым возаш, шомакым да ойсавыртышым шижын мошташ, шке семын лудаш туныктымыжо палемдыме кӱкшытыш шуаш полшат. Тунемшыже-влак ЕГЭ, ГИА годым сай шинчымашым ончыктат. Предмет дене олимпиадыш, сочинений конкурсыш ушнышо тунемшыже-влакын гына огыл, сеҥыше-влакынат чотышт кугем толеш. Республикыштат ончыл верлам наледат.

Туныктышо шкежат тыршышан, икшыве-влакым да шке профессийым йӧратыше, шонымашке шуаш тыршыше улеш, икшыве-влакым умыла, кертмыштлан ӱшана. Нуным еҥ-влакым пагалаш, пашам йӧратыше лияш туныкта.

Ульяна Александровна шке шинчымашыжымат эреак пойдара. Очный але заочный научно-методический семинар-влакын пашашкышт ушна. Ий еда БГУ-н Бирск филиалже гыч практикыш толшо студент-влакын пашаштым вуйлата. 2013-шо ийыште «Руш йылмым да литературым эн сай туныктышо» республикысе конкурсышто вийжым терген. У.А. Васильеван лӱмжым районышто Ончыл опыт банкыш пуртымо.

Шке пашажлан ӱшанле туныктышо чонжо дене эре икшыве-влак пелен, вет нуно мемнан ончыкылыкна улыт. Пашам тыршен ыштымыжлан У.А. Васильевам Башкортостан Республикысе Образований министерство Почетный грамот да тауштыме серыш, образований Мишкан пӧлка ятыр Почетный грамот да диплом дене палемденыт.

А эше ешарыме шуэш: Ульяна Александровна - сай пелаш да озавате, пиалан ава, йӧратыше да йӧратыме кова. Лӱмгече ийыштыже тудлан пеҥгыде тазалыкым, творческий сеҥымашым да еш пиалым тыланыме шуэш.

В. БАЙРАМОВА.

Еш архив гыч налме фото.