Пайрем кумылым йӱр ыш нӧртӧ

Тудлан тыршенак ямдылалтыныт гынат, пӱртӱс шке вашталтышыжым пуртылаш тӧчыльӧ. Но юалгырак игече да кечыгут ложгышо йӱр пайрем кумылым ни волтен, ни «нӧртен» ышт керт. Еҥ-влак посна-поснат, еш денат Каныш да тӱвыра паркыш чумыргеныт. Иктышт Комсомольский проспектыште кидмастар-влакын арверыштым шымлен коштыныт, весылан кугу сценыште кайыше концертым ончаш оҥайрак лийын, кӧ дыр Печать пӧртын палаткыже йыр пӧрдын - вигак возалтын, календарьым ыштыктен, Йошкар-Ола гыч «Сайвер» ательен кондымо марий вургемым, диск ден книга-влакым наледеныт, шашлыкым тамленыт да шокшо чайым подылыныт.

Олан кечыжлан палемдыме сомыл гыч кокытшо поснак шарнаш кодшо лие. Нефтекамскыште уэмдыме Сеҥымаш скверым торжественно почыч. Тудым «Формирование современной городской среды» программылан кӧра тӱзатыме. Ачалыме пашалан 19 миллион теҥгем кучылтыныт: памятникым реставрироватленыт, корнысо плиткым алмаштеныт. Сквер эше моторрак лийын.

Верысе калыкым Каныш да тӱвыра паркыште спорт дене заниматлаш чапле тренажер комплексым почмат куандарыш, шонем. Профессионалат, тыглай еҥат тушто кеч-могай жапыште тугок шкем шуарен кертеш. Тидлан кок миллион наре теҥгеаш 14 тренажерым вераҥдыме. Ты пашам «Пять шагов к благоустройству» программылан, «БашРТС» ООО-лан да моло организацийлан эҥертен шуктымо.

…Пайрем йӱд марте шуйныш. Кастенысе концерт деч вара йӱд каваште йӱр воштак тӱрлӧ тӱс дене салют «пеледалте», пич омо дене малыше южо еҥым пелйӱд шумо нерген шижтарыш.

Э. АЛЕКСЕЕВА.

Нефтекамск ола.