Ял озанлык пашаеҥынат, туныктышо-влакынат тургым жап

Кодшо кугарнян Башкортостан Республика Вуйлатыше Рустэм Хамитов Бирск да Мишкан районлаш миен коштын. Август тылзысе паша ойыртемым шотыш налын, эн ончычак уржа-сорла кузе эртыме дене палыме лийын. Виктор Челнынцевын кресаньык-фермер озанлыкыштыже (Бирск районысо Калинники села) шурным, тыгак рапсым, ош горчицым, крамбем да моло ӱян кушкылым кузе куштымым ончен.

Мишкан районысо Ардаш ялыште Тӧргым эҥер гоч кӱварым капитально ачалыме пашам аклен. 1970 ийыште ыштыме кӱвар чот тоштемынат, тудын гоч вончаш лӱдыкшӧ лийын, школ автобусланат, еҥ-влакланат автомашина дене Чорай села велчын йыр кошташ логалын. Шукерте огыл «Дормост» ООО транспортланат, йолешкыланат эҥер гоч лекташ йӧнан кӱварым чоҥен шуктен.

Рустэм Хамитов ял калык дене мутланен, тусо илыш нерген йодыштын. Кызыт ардаш-влак пӱртӱс газ дене пайдаланат, вӱдпучым ачалыме сомылым ворандарат. Республика Вуйлатыше нунылан селаласе ФАП-влакым уэмдыме программа негызеш модульный фельдшер пунктым ышташ лийме нерген ойлен.

Республика Вуйлатыше Ирсайыште шоҥгыеҥ да инвалид-влаклан стационарный социальный пансионатым: илыме, каныме, медицина пӧлемлам, столовыйым да молым – ончал савырнен. Проект почеш тушко 25 еҥым ончаш, 15 еҥым пашаш налыт. 2013-шо ий годсек пансионатыште ятыр ачалыме сомылым шуктымо, республикысе Паша да калыкым социальный аралыме министерствын направленийже дене толшо шоҥгыеҥ-влакым вераҥдат. Сентябрь тылзе гыч коммерческий йӧн денат ончаш налаш тӱҥалыт. «Те элыште эн ончыч концессий соглашенийым пеҥгыдемденда. Тыланда полшен шогыман. Чылажат миен лектеш гын, ты опытым кумданрак шарен колтыман», – палемден Рустэм Хамитов.

Мишкан агропромышленный колледжын пасулаштыже лачак уржа-сорла каен. Колледжын директоржо Валерий Байбулатов кеҥеж практик жапыште тунемше-влакын комбайн дене шурным шкеак погымышт нерген каласкален. Тений колледжыш эше 150 студентым налыныт, нуным ял озанлык производствын мастержылан, мӱкшызылан, чоҥышылан, поварлан, кондитерлан туныктат.

Ты кечынак Рустэм Хамитов «Триумф» физкультурно-оздоровительный комплексыште (2016-шо ийыште тудым Паралимпийский спорт рӱдер семын почмо), районысо туныктышо-влакын педсоветыштышт лийын. Педагог-влакым у тунемме идалык дене саламлен, республикыште образований система эффективно пашам ыштымым, олимпиада толкыным вияҥдаш, электронный туныктымаш технологий-влакым шыҥдарен толаш, профессиональный образований шотышто утларак тыршаш кӱлмым палемден да туныктышо-влаклан кундемна, элна верч эреак тыршен пашам ыштымыштлан таум каласен.

«Башинформ».