Эн мастар мӱкш оза Башкортостаныште ила

Элын эн сай мӱкшызыжым 11 августышто Уфаште эртыше конкурсышто палемденыт. Российын 20 регионжо гыч погынышо мӱкшым ончышо мастар-влак коклаште мемнан республикысе Ишибай район гыч Ильгиз Шангареев сеҥен.

Российысе мӱкшызӧ-влакын профессиональный мастарлыкыштым тергыме годымак «Самырык мӱкшызӧ», «Мӱкшым ончышо эн сай тукым», «Ӱдырамаш мӱкшызӧ», «Пушеҥге кӧргышто мӱкшым ашныше-влак» Башкортостанысе посна конкурсым эртареныт. Мӱкшым ончымаште тукымвож дене кылдалтше Мишкан район Тӧргымдӱр ял гыч

В.Н. Зайниевын, Калтаса район Калмаш ял гыч Н.И. Исакаевын ешышт шке пашаштым ончыктеныт. Тышке 17 район гыч мӱкшызӧ-влак ушненыт. Нунылан практикыште кучылтмо ӱнар деч посна теоретический шинчымашымат почын пуаш логалын.

Мӱйым, моло продукцийым, тӱрлӧ сатум ужалыме верым моторын сӧрастарен, мӱкшым ончымо озанлык пашам да шке районым ты пайремыште тичмашын ончыктен моштымо номинацийыште Зайниевмытын ешыштлан кумшо верым пуэныт. Россий кӱкшытан Мӱй пайремыште «Апимондия» мӱкшым ончымо ассоциацийын тӱнямбал федерацийжын президентше Филип Маккейб, Российысе мӱкшызӧ-влакын национальный ушемыштым вуйлатыше Арнольд Бутов, Башкортостан Республика Вуйлык Рустэм Хамитов, «Апимондий» ассоциацийыш пурышо элла - Турций, Танзаний, Киргизий - гыч, тыгак Италийын, Китайын представительышт лийыныт.

И. ИВАНОВ.

О. Яровиковын фотожо-влак.

Снимкыште: Зайниевмыт еш.