Россий Президент Йошкар-Олаште заседанийым эртарен

«Мемнан тӱрлӧ калык илыман эллан тиде моткоч кӱлешан документ, - рашемден Президент. - Тудын проектшым кумдан каҥашыме, кум тӱжем утла замечаний ден темлымашым шотыш налме да тӱҥ корным ойырымо. Тиде - Российысе калык-влакын тӱвыра ойыртемыштым арален кодымаш, шке нацийнан гражданский шкешамжым (самосознанийжым) да духовный икгайлыкшым чоткыдемдымаш».
Владимир Путин верысе самоуправлений органлаштат калык-влак кокласе кыллан вуйын шогышо пашаеҥым пеҥгыдемдыме, элыште улшо пайдале практикым кумданрак шарыме, ты сомылым кузе ворандарымым палаш манын, мониторингым эртарылме, калык-влак кокласе кыл шотышто региональный да муниципальный служащий-влакым ямдылыме да шинчымашыштым пойдарен толмо нерген ойлен. Региональный да муниципальный власть орган-влакын национальный кугыжаныш политикым илышыш шыҥдарыме пашаштым ворандарен колташ манын, Правительствым профессиональный стандартым да методикым писынрак радамлаш йодын.
Кундем ден муниципалитет-влаклан шке этнокультурный брендыштым чолганрак вияҥден толаш темлен. «Мемнан элна пӱртӱс, калык да йӱла-влак шотышто чот ойыртемалтеш, но шукыж годым инфраструктурылан верч веле огыл, верлаште инициатива укелан кӧрат нуным шымлаш йӧн уке, - каласен тудо. - Тыгодым тӱнямбалнат, мемнан элыштат еҥ-влак этнографий туризмым оҥайлан шотлат. Российыште ончыктышаш, кугешнышаш вер-влак ятыр улыт».
Эл вуйлатыше Российысе национальный республикыласе школлаште руш йылме предметлан шагалрак шагатым ойырымым, айдемылан тудлан йот улшо йылмым виеш тунемаш темлымым йӧплен огыл. «Руш йылме - кугыжаныш, калык-влакын икте-весе дене кылым кучымо йылмышт. Тудым нимо дене алмашташ огеш лий, тудо тӱрлӧ калык илыман элнан шӱм-чон кышкарже улеш, ты йылмым чыла еҥ палышаш», - манын тудо. Тыгак Российысе калык-влакын йылмыштат ойыртемалтше культурынан ужашыже улмо, Конституций нине йылмылам тунемаш правам пуымо, но нуным шке кумылын тунемме нерген ойлен. Йӱла да национальный идентичность дене кылдалтше йодышлам пеш шекланен да шонкален йӧнештарыман, мемнан элыште ты шотышто шагал огыл пайдале опытым погымо, иктешлен эл вуйлатыше.
Владимир Путин Йошкар-Олаште Марий Эл Вуйлыкын пашажым шуктышо Александр Евстифеев дене вашлийын, Т.Е. Евсеев лӱмеш национальный тоштерыште лийын.

Лудшо-влаклан палашышт:

Калык-влак кокласе кыл шотышто Президент пеленсе советым, ты йодыш шотышто кугыжаныш политикым саемден шогаш манын, 2012-шо ийыште ыштыме. Тушко элысе национально-культурный ушем-влакын лидерыштым, наука да эксперт тӱшка-влакын еҥыштым, законодательный да исполнительный власть федеральный орган-влакын вуйлатышыштым пуртымо. Ты Советым Владимир Путин вуйлата.

Э. АПТУЛМАНОВА ямдылен.