Мланде ден кава коклаште

Калтаса район Ӱлыл Качмаш ял гыч Роман Искибаев парашютист-влакым йочаж годсекак шинча йӱлен эскерен. Тулеч вара иктаж гана кава помышто лияшак шонен пыштен. Кызыт парашют дене тӧрштылмаш - тудын шкешотан хоббиже.

«Изиэм годым Калтаса селаште эртыше Сабантуйыш Октябрьский ола гыч толшо парашютист-влакым чон вургыжын эскеренам, шкемынат нунын олмышто лияш кумыл шочын. Армийыште службым теҥыз пехотышто эртыме годым водитель лийынам, садлан кава гыч тӧршташ йӧн ыш лий (Парашют дене разведке да десант подразделенийысе боец-влак веле тӧрштылыныт.). Туге гынат армий деч вара парашютист лияш шонымашем пеҥгыдеме… Тачысе кечылан «Школьник», Д-6, Д1-5У, П1-У моделян парашют-влак дене чылаже 12 гана тӧрштенам. Парашют дене тӧрштымын шке радамже уло - ондак ик тӱрлӧ моделян парашют дене вийым тергыман, тудым сеҥет, чыла сай гын, вес тӱрлӧ парашютым ӱшанат. Икымше гана парашют дене 2014-ше ийыште Ижевск олаште тӧрштенам. Вигак инструктор деч посна. Тудо кечым тачысе гаяк шарнем. Южым шелын, 1200 метр кӱкшыт гыч «чоҥештыме» годым вуй уш мом ыштымым вигак умылен ок шукто - тый эше тиде тӱняште улат але вес вере… Тений але шушаш ийлан спортивный парашютист-влак разрядыш «куснаш» шонем. Тиде спорт шкем сеҥаш туныкта», - куанжым ок шылте чолга рвезе.

Л. ШАВАЛИЕВА.