Пӧлекымат кучыктеныт

Автомобильым ужалыше салон-влак, тиде сферыште кугу конкуренцийлан кӧра, шкешт нерген утыр кумданрак палдараш тыршат.

Эртыше шуматкечын оласе ик автосалонышто «Абсолют» компаний ик эн палыме внедорожникым 40 ий лукмылан пӧлеклалтше мероприятийым эртарыш. Тиде автодилер газет редакций дене шукертсек пеҥгыде кылым куча, сандене тушко уна семын мемнамат ӱжыныт ыле.

Пайремыш калык шагал огыл чумыргыш. Салонын моторын сӧрастарыме икымше пачашыштыже унала пурышо кажне еҥ фуршет ӱстелыште сийлалтын, выставкысе автомашинаш шинчын, еш дене фотосессийым ыштен, конкурслаште вийым терген, тест-драйвыште мастарлыкым ончыктен да эн тӱҥжӧ пӧлек-влакым модмашке ушнен кертын. Компанийын темлыме ик призшым - магнитолым - Нефтекамск олаште илыше А. Калитов модын нале. Шке мутшо гын, ешыже «Чолман» газетым куанен лудеш, ола воктенсе ялыште илыше аваже газетлан возалташ эреак йӧным муэш. А весела модышлаште ойыртемалтше йоча-влаклан вӱдышӧ-влак батут паркыште тӧрштылаш сертификатым кучыктышт.

Л. ШАВАЛИЕВА.

Нефтекамск ола.