Езбика акай

Шукерте огыл Илиш районын рӱдӧ библиотекыштыже Башкортостан Республикысе ял озанлыкын сулло пашаеҥже Избика Галиевна МИНИЛБАЕВАЛАН пӧлеклыме касым эртарышт. Ӱмыржӧ мучко трактористлан ыштыше ӱдырамашым 75 ийым темымыж дене шокшын саламлышт.

Паспортыштыжо лӱмжым Избика манын возалтын гынат, ялыште тудым чылан «Езбика акай, кокай» маныт. Аваже да лишыл еҥже-влак Чепа маныныт. «Тудо легендарный айдеме, районын тӱсшӧ», - манеш Илиш районышто марий мер толкыным вуйлатыше М.П. Дмитриев. Езбика акай тидым шкежат пала, но кугешнен ок кошт.

И.Г. Минилбаева изинек техникылан шӱмаҥ кушкын. Кызытсе саманыште, тракторым, мотоциклым, машинам виктарыше ӱдырамашым ужын, нимыняр огына ӧр. Эмансипаций. Но тунам, 70-ше, 80-ше ийлаште, тиде изишак ӧрыктарен. Ялыштына Маруся акай трактор дене, Лиза акай шоферлан ыштышт гынат, ик жап веле. Езбика акай шкенжын Т-40 тракторжым пенсийыш лекмеш вӱдыш. Трактор дене ыштымыж годым пошкудыжо-влакын йодмыштлан шудым, олымым, пум ятыр шупшыктен. Чыла тидым паша деч вара, кастене, ыштен, а эрдене пашашке вашкен. Тудын техникым йӧратымыже мотоцикл дене коштмаштыжат коеш ыле. «Ковровец» мотоциклже дене пошкудо яллашкат, уналат кудалыште. А варарак, оксам поген, «Запорожец» автомобильым нале. Тунам тиде машина дене Караидель район Шопкер ял гыч пошкудыжлан ӱдырым налын тольо. Лишыл яллаш коштмыжым кызытат шыргыжал шарналтат.

Ф. БАЙТУКОВ.

Красный Октябрь ял, Илиш район.

Умбакыже газетыште лудса.