Клубыш калык тич погынен

Шоҥгыеҥ-влакын мутышт почеш, Кугу Ачамланде сар пытымеке, Соказа, Коклалоҥго, Пӱнчер ялла гыч самырык-влак колхоз паша деч вара Тӧргым эҥер гоч пыштыме кӱварыште погыненыт, гармонь почеш муреныт-куштеныт. Тушто ямле лийын гынат, калыклан клуб кӱлын. Колхоз правленийын пунчалже деч вара паша тарванен. 1963-шо ийыште Соказа калык шке вий дене клубым ыштен, илыш ылыжын. Варарак, 1986-шо ийыште, кермыч гыч у клубым чоҥеныт.

Июнь мучаште Кугу Соказа ялыште у клублан 30 ий теммым палемдышт. Пайремыш ятыр пагалыме унам ӱжмӧ ыле. Нунын илышышт ялысе клуб дене чак кылдалтын. Мутлан, А. Аптулманов самырыкше годым ты кӱварыште ямле гармонь сем почеш куштен, С. Ирбулатов колхозыш пашаш толмыж годым клубым чоҥен, И. Яметов вокально-инструментальный ансамбльыште мурен, клубышто шындыме спектакльлаште модын…

Культура илыш ий гыч ийыш вияҥ толын. Тидлан шуко еҥ вийжым пыштен. Музыкант да организатор П.А. Андриянов тошто клубыштак, 1963-шо ийыште, пашам ышташ тӱҥалын. Вуйлатыме хорыштыжо 70 утла еҥ мурен. Пётр Андриянович ден ватыже, Елена Исаевна, ныл икшывым ончен куштеныт. Ирина ден Светлана ачаштын корным тошкат. Ирина Петровна Йоча искусство школышто туныкта, Светлана Петровна Челябинск олаште педуниверситетыште тырша, «Вита» вокал ансамбльым да О. Митяевын студийыштыже «Мировые песни» ансамбль-влакым вуйлата. Вениамин Янчиев - тале музыкант, «Шÿм пöлек» ӱдырамаш вокал ансамбльын вуйлатышыже. Ту жапыште клубышто драмкружок пашам ыштен. Тушко М. Андриянов, Т. Семниева, И. Яметов, Г. Сайпашева, Я. Сагадеев да молат коштыныт. 1978-ше ийыште культура пӧртыштӧ Мишкан йоча музыкальный школын филиалже почылтын. Йошкар-Оласе культпросветучилище деч вара тышке А. Байбулатова пашам ышташ толын. Музыкальный школышто тӱрлӧ ийлаште талантан еҥ-влак В. Садретдинов, С. Гайнетдинов, Т. Байназова, Л. Игинашева тыршеныт. Кызыт йоча-влакым аккордеон, фортепьяно дене шокташ И. Шамуратова туныкта. Римма ден Минилбай Яркиевмыт 20 ий пашам ыштыме жапыште клубышто кином ончыктеныт. М. Николаева 30 ий утла «Эрвий» йоча образцовый драмкружокым вӱден. Кызыт пашажым Н. Апликаева шуя. Клуб пеленсе библиотекыште Р. Айдимирова тыршен, варарак Н. Николаева толын. Клубышто ятыр ий С. Апаева, Е. Андриянова, Т. Зайниева, А. Владимирова, З. Кутлусаманова, О. Андреева тыршеныт, кызыт Т. Шамиданова, М. Павлова арулыкым эскерат.

Уна-влак пайремыште клублан аппаратурым налаш окса сертификатым кучыктышт. Ялыште культурым нӧлтышӧ пашаеҥ ден активист-влакым Чап грамот да тауштыме серыш дене палемдышт. Пайремым Соказа да пошкудо ялла гыч мийыше усталык коллектив-влак сӧрастарышт.

Е. МАТВЕЕВА.

Мишкан район.