Кажне еҥ сайын илаш тырша

Сай илышым чоҥаш шонышо еҥ ешыштыжат, йырым-йыржат ваш-ваш йӧратыме, аклыме, сай ден удам умылымо койышым шыҥдараш тырша. Тыгай ешыште гына йӧратымаш, икте-весым умылымаш, тыныс, поро шӱлыш, икгай шонымаш, кажне татлан йывыртен моштымаш озаланат. Тыгай еш дене палыме лийме шуэш.

Атлегач ялыште илыше Ахматаевмытын кок пачашан пӧртышт шке моторлыкшо, чаплын чоҥен, тӱзатен шындыме дене ойыртемалтеш. Тудым тӱрлӧ пеледыш сӧрастара, изиеҥланат, кугурак-влакланат каныме верым келыштарыме.

Александра Тимиряновна ден Борис Апзялиевичын пырля илымыштлан тений нылле ий лиеш. «Ме Борис дене 1969 ийыште, Тумна ял школышто визымше классыште тунеммем годым, палыме лийна. Ме, тунемше-влак, Татьяна Ивановна Пашкинан вуйлатыме почеш шочмо Тошто Шадемучаш ялыштем концертым ончыктышна», - шарналта Александра. «Тиде кечынак меат, Атлегач ял ӱдыр-рвезе-влак, шке келыштарыме номер-влак дене тиде ялыш миенна ыле, - ушна мутланымашке Борис.

- Мый тунам 7-ше классыште тунемынам. Ты кастене кок концерт лие. Мыланем сылне башкир вургем дене куштышо мотор, йытыра ӱдыр келшыш, палыме лийна».

Борис школ деч вара армийыште служитлен, Йошкар-Оласе культпросветучилищын куштымо пӧлкашкыже тунемаш пурен. Саня школ деч вара Кинешма олаште пашам ыштен. Тыге нуно кандаш ий серыш гоч «мутланеныт», икте-весе нерген шукырак пален налаш тыршеныт.

А. ИЛЬЧИГУЛОВА.

Атлегач ял, Янаул район.

Умбакыже газетыште лудса.