Агытанда муным мунчыжо, шорыкда пачам кондыжо

Шорыкйол - марий калыкын ик эн тошто, оҥай пайремже.

Шорыкйол водым эртараш Йывангасола библиотекын озаже Х. Шакирьянова дене пырля калыкым тарватышна. Пайремым сӧрастараш полшышо-влак, шорык коваште гыч ужгам чиен, тӱкан упшым упшалын, Агытан идалыклан кӧра агытанла чиен, Йывангасола, Пермесола, Ведрес ялласе икмыняр кудыш Васлий Кугыза лийын кайышт. Эн ончыч Йывангасолаште Прокопьевмыт суртыш лӱдынрак пурен шогальыч (Тыгай коштмаш шукертак лийын огыл.). Поро сугыньым ойлен, рыскалым тыланен, поро пашам ыштышыжым мокталтышна, йогыланышыжым вурсалтышна, «Агытанда муным мунчыжо, шорыкда каза пачам кондыжо» манын воштылтышна. Васлий кугыза-влакым ӧрын вашлийыч гынат, чыла суртыштат мелна дене чайым йӱктен колтышт. Суртлаште Васлий кугыза-влак изи йоча-влакым модыктышт, йомакым, туштым туштышт, мыскарам ойлен воштылтышт, сийлан, порын вашлиймыштлан тауштен муралтышт. Озамыт деке эн ончыч агытанла чийыше
Л. Зариповам пуртышна. Тудыжо «Ку-ка-ре-ку! Агытан ий дене саламлем!» манын куандарыш. Васлий куват рольжым мастарын модо.

Пермесолаште Марковмыт, Костинмыт, Михайловмыт суртыш пурышна. Васлий кугыза-влакым чылан сайын вашлийыч. Уремыште Йывангасола культура пӧртын вуйлатышыже Л. Алынбекова да А. Прокопьева йоча-влакым модыш ден веселитлышт - ик тӱшка деке лишемын, «Ух, ӧргалам» манын койдарышт. Йоча-влак утен каен воштыльыч. Библиотекын озаже Христина Михайловна йоча-влак дене Шорыкйол нерген кутыралтыш, рвезырак ешыштат пайрем нерген тӱрлӧ йодышлам пуэдыш.

Ведрес ялыште илалше-влак пеш куанен кодыч. Рвезе жапыштымат шарналтышт, Шорыкйолым эртарымышт нерген каласкалышт.

Тиде кечын, 14 январьыште, Шорыкйол кас дене пырля иквере Нефтекамск филармонийын мурызыжо Р. Исанбаева да тудын группыжын концертышт лие.

Шорыкйол кас моткоч сӧралын эртыш, но, чаманен каласаш логалеш, калык шагалрак ыле. Чынжымак, пытартыш жапыште калык культура пӧртыш корным мондаш тӱҥалын. Культура илыш деч ӧрдыжкӧ кораҥаш шотлан ок тол. Тунам айдемын чонжо йӧршын пӱнышка. Йорлештше чонан айдеме илыш деч вараш кодеш. Ме марий калыкнан историйжым, йӱлажым палышаш да пагалышаш, марий йылмынам йӧратен тунемшаш улына.