Пайрем ӱстелын чесше - комбо

Тиде пайрем дене марий калыкын ятыр йӱлаже кылдалтын. Ятас кучымо пайремым калыкыште вес семынже «Комбо пайрем» маныт. Пайрем ӱстелын тӱҥ кочкышлан лӱмын ямдылыме комбо шотлалтеш.

Палемдыме кечын озавате суртыш уна-влакым ӱжын. Ятыр погыненыт - изижат, кугужат миеныт. Мыняр уна, комбо шылым тунар ужашлан пайлыман. Тиде суапле сомылым озавате пошкудыжлан ӱшанен. А оҥ ужашыжым логалын огытыл - пайремыште тудын посна верже. Суртышто муро йоҥген, самырык-влак «Вич мужыр» дене модыныт, куштеныт. Суртозан рольжым Мишкан селасе Марий тӱвыра да историй рӱдерын тӱҥ специалистше А. Ибулаев келыштарен. Ятас кучымо пайремым «МуроЭм» ансамбль сӧрастарен.

Пайрем мучаште суртоза эн шерге уна дене коктын, казаварня дене пижыктен, икте-весышт коклаште ятасым пайленыт. Кугурак лу падырашым налшыже вес гана тыгай пайремыш уна-влакым шке суртышкыжо ӱжеш да комбо чесым ямдыла.

Л. ГРИГОРЬЕВА.

Марий тӱвыра да историй рӱдер гыч колтымо фото.