Шопкерыште Коҥга пайрем эртыш

Тиде ялым районысо марий тӱвыра рӱдерлан шотлаш лиеш. Тысе школышто марий йылмым тунемыт, а ялысе клубышто Башкортостан Республикысе тӱвыран сулло пашаеҥже Э. Салиеван вуйлатыме «Ший памаш» фольклор коллектив пашам ышта.

Мемнан кундемыште тиде йӧршын у пайрем. Садланак, очыни, тудо калыкын кумылжым ылыжтен, ятыр ешым чумырен керте.

Мо тыгай коҥга ялысе суртышто? Тиде шокшо, поро кумыл, коҥгаште ямдылыме тутло кочкыш. Перемечым, когыльым, мелнам, киндым электродуховкешат ямдылаш лиеш, конешне, но тудын тамже, пушыжо нигунамат пу дене олтымо коҥгаш кӱктымӧ гай огыт лий. Ялысе суртышто коҥга - илышын рӱдыжӧ. Проста марийын илышыштыже коҥга эре кугу верым налын. Арамлан огыл калык ойпогышто коҥга нерген калыкмут, пале, муро, ойӧрӧ моткоч шуко вашлиялтыт.

Тиде кечын Шопкерыште райрӱдӧ гыч мийыше уна-влаклан Эмма Алексеевна Салиеван суртыштыжо «Ятас кучымаш» пайремым ончыктышна. А ял калык коклаште эн мотор коҥгалан конкурсым эртарышна. Тачысе кечын ончыл технологий-влак коҥгам тӱрлӧ семын лукташ йӧным ыштат, мутлан, кафель дене петыраш да молат. Тидлан кӧра эн сай коҥгам ойырен налаш чынжымак моткоч неле ыле.

Пайрем ялысе клубышто умбакыже шуйныш. Озавате-влак мелнам кӱэштме конкурсышто усталыкыштым ончыктышт, калык йӱлам да тӱвырам палыме шотышто таҥасышт. Вашлиймашым Шопкер клубын «Ший памаш» да Марий историй да тӱвыра рӱдерын «МуроЭм» фольклор коллективышт сӧрастарышт. Конкурсыш ушнышо-влакым «Калык йӱла», «Уста озавате», «Тамле сий» да «Ушан-шотан» номинацийлаште БР-ысе Калык-влак келшымаш пӧрт деч диплом да шарнаш кодшо пӧлек дене палемдыме.

А. ИБУЛАЕВ, Марий историй да тӱвыра рӱерын тӱҥ специалистше.

Снимкыште: Э. Салиева унам сийла.